NE ANE kaka wuowini okuyo kendo osandore malich. Ma en Josef. Owetene oa use ne joma dhi Misri gi. Ka gichopo kuro, to ibiro tim Josef obed misumba. Ang’o momiyo owetene otimo gima rachni? En nikech nyiego omakogi kod Josef.

Jakobo wuon-gi ne ohero Josef ahinya. Ne onyiso ni ne ohere moloyo kane olosone kandhu maber. Ka owetene apar ne oneno kaka oher Josef, nyiego ne omakogi kendo ne gi sin kod Josef. Kata kamano, ne nitie gimoro machielo ma ne omiyo gi sin kode.

Josef ne oleko lek ariyo. Ei lek ariyogo duto, ne oneno ka owetene kulorene. Josef kane opimo ni owetene leknego, ne gimedo sin kode moloyo.

Koro, chieng’ moro kane owete Josef madongo ne kwayo rombe wuon-gi, Jakobo ne okwayo Josef ni mondo odhi one ka owetene dhi maber. Owete Josef kane onene ka obiro, moko kuomgi ne ochako wacho: ‘Wanege uru!’ Kata kamano, Reuben, wuowi makayo ne owacho ni: ‘Ooyo, kik utim kamano!’ Kar nege, ne gimako Josef ma giwite e bugo moro. Bang’ mano, gibet piny mondo gipar gima digitim kode.

Koro, Jo-Ishmael moko biro kanyo kar sechego. Juda nyiso owetene ni: ‘Wauseuru ni Jo-Ishmaelgi.’ Kendo mano e gima gitimo. Giuso Josef e nengo mar fedha piero ariyo. Mano ne en tim mamono kendo maonge hera manade!

Ang’o ma owetego biro nyiso wuon-gi? Ginego diel, to bang’e ginyumo kandhu maber mar Josef e remb diendno. Bang’ mano, gitero nangano dala ir Jakobo wuon-gi, kendo giwachone ni: ‘Ne wayudo lawni. Ng’iye, ine ka be ok en law Josef.’

Jakobo neno ni en law Josef adier. Oyuak kowacho ni: ‘Nyaka bed ni ondiek onego Josef.’ To mano e gima owete Josef dwaro ni mondo wuon-gi opar. Jakobo koro okuyo ahinya. Oyuak kuom ndalo mang’eny. Kata kamano, Josef podi ok otho. We wane gima timorene kama otere.