WE MONDO wadog chien higini matin mosekalo, ka podi Ezra ne ok odhi Jerusalem. Mordekai kod Esther gin Jo-Israel madongo e pinyruodh Persia. Esther en chi ruoth, to Mordekai owadgi, en jalup ruoth e telo. We mondo wane kaka mani ne otimore.

Jonyuol Esther ne otho kane podi otin ahinya, omiyo Mordekai ema ne opidhe. Ahasuerus ma ruodh Persia, nikod ode e dala mar Shushan, kendo Mordekai en achiel kuom jotije. Chieng’ moro, Vashti ma chi ruoth tamore winjo chik ruoth, omiyo ruoth yiero dhako machielo mondo obed ruoth madhako. Be ing’eyo dhako ma oyiero? Ee, nyako ma jachia miluongo ni Esther.

Be ineno ng’at ma jasunga ma ji kuloreneno? Mani en Haman. En ng’ama duong’ ahinya e pinyruodh Persia. Haman dwaro ni mondo Mordekai, minyalo neno ka obet kae, okulorene bende. Kata kamano, Mordekai otamore. Oneno ni ok en gima kare mondo okulore ni ng’a marach kaka ng’atni. Mani miyo Haman bedo gi mirima ahinya. Kuom mano, ma e gima Haman timo.

Haman nyiso ruoth weche mag miriambo kuom Jo-Israel. Owachone ni, ‘Gin jo maricho ma ok luw chikeni. Onego oneg-gi.’ Ahasuerus ok ong’eyo ni chiege ma Esther en Nya-Israel. Kuom mano, owinjo wach Haman, kendo ogolo chik mawacho ni mondo oneg Jo-Israel duto e odiechieng’ moro.

Mordekai ka winjo wach chikno, obedo gi chuny malit ahinya. Ooro ote ni Esther kama: ‘Nyaka iwuo gi ruoth, kendo ikwaye mondo oreswa.’ Chik mar Persia ok oyie ne ng’ato mondo odhi one ruoth ka ok oluonge. Kata kamano, Esther dhi neno ruoth, kata obedo ni ok oluonge. Ruoth rieyo ni Esther ludhe mar dhahabu, manyiso ni kik nege. Esther gwelo ruoth kod Haman e nyasi maduong’ mar chiemo. Kanyo, ruoth nyiso Esther mondo owach gimodwaro kuome. Esther nyise ni obiro nyise seche ma ruoth kaachiel gi Haman gibiro chiemo kode kendo, e odiechieng’ maluwe.

Kuom mano, e odiechieng’ maluwe, Esther nyiso ruoth ni: ‘Ogandawa koda an ibiro negi.’ Ruoth iye wang’. Openjo ni: ‘Ng’ano ma nyalo paro timo gi machalo kamano?’

Esther wacho ni: ‘Jawasiguno, en Haman!’

Kuom mano, koro ruoth nigi mirima ahinya. Ochiko ni mondo oneg Haman. Bang’e, ruoth keto Mordekai obed jalupne e kom duong’. Mordekai koro miyo chik manyien betie, manyiso ni Jo-Israel onego oked ne ngimagi e odiechieng’ ma onego neg-gie. To nikech Mordekai koro en ng’a maduong’, ji mang’eny konyo Jo-Israel kendo iresogi kuom wasikgi.