BE INYALO paro wach yawuowi adekgi? Ee, gin osiepe Daniel ma ne otamore chamo gigo ma ne ok beyo negi. Jo-Babulon ne luongogi ni Shadrak, Meshak kod Abednego. Kata kamano, ng’igi ane koro. Ang’o momiyo ok gikulore ni kido maduong’ni kaka jomoko? We wane.

Be inyalo paro chike ma ne Jehova owuon ondiko miluongo ni Chike Apar? Mokwongo en: ‘Kik ilam nyiseche moko mak mana an.’ Yawuowigi luwo chikno, kata obedo ni ok en gi mayot timo.

Nebukadnezzar ruodh Babulon oluongo jo madongo manie pinye mondo obi omi kido ma osechungo luor. Eka oa wacho ne ji duto ni: ‘Ka uwinjo dwond tung’ gi asele koda thumbe mayoreyore, nyaka upodhi kendo ulam kido mar dhahabuni. Ng’ato ang’ata ma ok kulre mondo olam kidoni, ibiro wite mapiyo ei mach maduong’ maliet.’

Nebukadnezzar ka winjo ni Shadrak, Meshak kod Abednego ok okulore, mirima make ahinya. Owacho ni mondo okelgi ire. Ochako omiyogi thuolo moro mondo gikulre. Kata kamano, yawuowigo keto geno margi kuom Jehova. Ginyiso Nebukadnezzar ni: ‘Nyasachwa mawatiyone nyalo resowa. To kata ka ok oresowa, ok wabi kulore ni kido ma iketo mar dhahabu.’

Ka owinjo wachno, Nebukadnezzar iye medo wang’ moloyo. Nitie mach maliet machiegni gi kanyo, kendo ogolo chik ni: ‘Chwak uru mach mondo obed maliet nyadibiriyo maloyo kaka ne en!’ Bang’e owacho ni joge maroteke kuom jolweny mage mondo otwe Shadrak, Meshak kod Abednego, kendo giwitgi e mach malietno. Mach maduong’no liet ahinya ma joma rotekego tho nikech liet. To nade yawuowi adek ma ne giwito e mach?

Ruoth ka ng’iyo i mach, luoro make ahinya. Openjo ni: ‘Donge ne watweyo ji adek ma wawitogi e mach maliet?’

Jotich dwoke ni: ‘E en kamano.’

Owacho ne jotichne ni: ‘To aneno ji ang’wen mawuotho kalworore ei mach. Ok otwegi, to mach bende ok hinygi. To ng’at mar ang’wen nigi kido mar nyasaye.’ Ruoth sudo machiegni gi dhood kendo maduong’ mar mach, kendo okok matek ni: ‘Shadrak! Meshak! Abednego! Wuog uru oko un jotich Nyasaye man Malo Chutho!’

Ka giwuok oko, ng’ato ang’ata nyalo neno ni ok gi hinyore. Bang’e ruoth wacho ni: ‘Omi Nyasach Shadrak, Meshak kod Abednego pak! Oseoro malaikane mondo oresgi nikech ok ne ginyal kulore ni nyasaye moro mak mana en.’

Donge mano en ranyisi maber ma wanyalo luwo, mar chung’ motegno e nyim Jehova?