BE ING’EYO ng’at ma onindo piny kanyono? En Saulo. Par bende ni en ema ne orito lep joma ne ogoyo Stefano gi kite. Ne ane ler marieny ahinyano! En ang’o matimore?

Ka Stefano osenegi, Saulo kawo telo e dwaro jolup Yesu, mondo osandgi. Odonjo e utegi, ogologi oko, kendo owitogi e jela. Ng’eny jopuonjrego ringo nyaka pinje mamoko, kendo gichako lando “wach maber” kuondego. Kata kamano, Saulo dhi e pinje moko mondo omany jolup Yesu. Koro en e yo odhi Damaski. To ka en e yo, ma e gimiwuoro matimore:

Apoya nono, ler moa e kor polo mil kalworo Saulo. Opodho piny mana kaka wanyalo neno kae. Bang’ mano, dwol wacho ni: ‘Saulo, Saulo! Isanda nang’o?’ Joma nigi Saulo neno lerno, kendo giwinjo dwolno, kata kamano ok giwinj tiend weche miwacho.

‘In ng’ano, Ruoth?’ Saulo penjo.

Dwolno dwoko ni, ‘An Yesu, misando.’ Yesu wacho mano nikech, seche ma Saulo sando jolup Yesu, Yesu winjo ka gima en ema isande.

Saulo koro penjo ni: ‘Ang’o ma onego atim, Ruoth?’

Yesu wacho ni: ‘A malo, idonj e dala mar Damaski. Ibiro nyisi kuro gima onego itim.’ Saulo kachung’ kendo elo wang’e, ok onyal neno. En mwofu! Kuom mano, joma nikode mako lwete, kendo taye nyaka Damaski.

Yesu koro wuoyo kod achiel kuom jopuonjrene man Damaski, kowacho ni: ‘A malo Anania. Dhi e yo miluongo ni Tir. E od Juda, ipenj ng’at ma nyinge Saulo. Aseyiere obed jatichna makende.’

Anania winjo wachno. Ka oromo gi Saulo, oketo lwete kuom Saulo kendo owacho ni: ‘Ruoth oseora mondo omi ichak inen, kendo mondo roho maler opong’i.’ Gikanyono, gimoro machalo gi kagakla lwar koa e wenge Saulo, to ochako neno kendo.

Itiyo gi Saulo e yo malach ahinya e lando wach ne ji moa e ogendini mang’eny. Ichako luonge ni jaote Paulo, kendo wabiro puonjre mang’eny kuome. To mokwongo, we wane gima Nyasaye oro Petro mondo odhi otim.