KA PETRO gi Johana osewuok e liel kama ringre Yesu ne nitie, Mariam dong’ kanyo kende. Ochako yuak. Eka olung’ore, kendo ong’iyo i liel mana kaka ne waneno e picha mokalo. Oneno malaike ariyo kanyo! Gipenje ni: ‘Ang’o momiyo iyuak?’

Mariam dwokogi ni: ‘Gikawo ruodha, to ok ang’eyo kama giketee.’ Eka Mariam lokore, kendo oneno ng’at moro. Ng’atno penje ni: ‘En ng’ano ma imanyo?’

Mariam paro ni ng’atni en jarit puodho, kendo ni en ema nyalo bedo ni okawo ringre Yesu. Kuom mano, owacho ni: ‘Ka in ema ikawe, kona kama iketee.’ Kata kamano, kuom adier ng’ani en Yesu. En gi del ma Mariam ok nyal ng’eyego. Kata kamano, seche moluongo Mariam gi nyinge, Mariam fwenyo ni ma en Yesu. Oringo dhi nyiso jopuonjre ni: ‘Aneno Ruoth!’

Bang’e godiechieng’, ka joote ariyo wuotho ka dhi e dala mar Emmau, ng’at moro chako wuotho kaachiel kodgi. Jootego okuyo ahinya nikech Yesu onegi. Kata kamano, kaka gimedo wuotho, ng’atno leronigi gik mang’eny moa e Muma mahoyo chunygi. Gikone, seche ma gichung’ mondo giyud gago, jopunjrego fwenyo ni ng’atni en Yesu. Bang’ mano, Yesu lal e wang’gi, kendo jopuonjre ariyogi dok Jerusalem piyo dhi nyiso joote wachne.

Seche ma mano timore, Yesu fwenyore ni Petro bende. Jo mokogo bedo gi ilo ka giwinjo wachni. Eka jopuonjre ariyogi dhi Jerusalem, kendo giyudo joote. Jopuonjrego nyisogi kaka Yesu bende ne ofwenyore negi e yo. To gie seche ma ne gilero wachno, bende ing’eyo gima timore miwuoro?

Ng’i ane pichano. Yesu fwenyore negi ei odno, kata obedo ni dhoot olor. To mano kaka jopuonjre mor! Donge mano en odiechieng’ makelonigi mor? Be inyalo kwano ni koro Yesu osefwenyore ni jolupne nyadidi? Be ikwano nyadibich?

Jaote ma Thoma ok ni kodgi e seche ma Yesu fwenyore nigi. Kuom mano, jopuonjre wachone ni: ‘Waneno Ruoth!’ Kata kamano, Thoma wacho ni nyaka one Yesu en owuon kapok oyie wachno. Koro bang’ ndalo aboro, jopuonjre Yesu ni kaachiel kendo ei ot ma dhoode olor, to wang’ni Thoma nikodgi. Apoya nono, Yesu fwenyore negi ei ot kanyo. Koro Thoma yie.