NE ANE nyororo man kuom Paulo, kaachiel gi jalweny Jo-Rumi moriteno. Paulo en mabus e Rumi. Orito nyaka Kaisar jatend Rumi ong’ad gima odwaro timo kode. Kinde ma en mabus, oyiene yudo welo.

Ndalo adek bang’ Paulo chopo Rumi, ooro wach mondo jotend Jo-Yahudi obi onene. Kuom mano, Jo-Yahudi mang’eny man Rumi biro nene. Paulo yalonegi e wi Yesu kod pinyruodh Nyasaye. Moko kuomgi bedo gi yie, kendo gibedo Jokristo, kata kamano moko ok yie.

Paulo yalo bende ni askeche mopogore opogore moket mondo orite. Kuom higini ariyo motwe Paulo kae kaka mabus, olando wach ne ji duto monyalo. Nikech mano, kata mana jood Kaisar winjo wach maber mar Pinyruoth, kendo moko kuomgi bedo Jokristo.

To wendo manie mesa kandikono en ng’a? Be inyalo ng’eye? Ee, en Timotheo. Timotheo bende ne osebedo e jela nikech lando wach Pinyruoth, kata kamano, koro en thuolo kendo. To obiro kae mondo okony Paulo. Be ing’eyo gima Timotheo ndiko? We wane.

Be iparo dala mar Filipi kod Efeso e Sigana mar 110? Paulo ne okonyo e chako kanyakla mag Jokristo kuonde ariyogo. Koro, ka en e jela, Paulo ndiko barupe ni Jokristogi. Barupegi yudore e Muma, kendo iluongogi ni Jo Efeso kod Jo Filipi. Paulo koro nyiso Timotheo kae, gima onego ondik ni osiepegi ma Jokristo man Filipi.

Jo-Filipi osenyiso Paulo ng’wono mang’eny ahinya. Ne giorone mich moro ka en e jela kae, omiyo Paulo goyonigi erokamano nikech mano. Epafrodito ema ne okelo michno. Kata kamano, ne obedo matuwo ahinya, kendo ne ochiegini tho. Koro to osewinjo maber, kendo oikore dok pacho. Obiro ting’o baruani moa kuom Paulo gi Timotheo kodok Filipi.

Ka en e jela, Paulo ndiko barupe ariyo moko, kendo wan kodgi e Muma. Achiel kuomgi en barua ma ne ooro ni Jokristo man e dala mar Kolosai. Be ing’eyo kaka iluonge? Jo Kolosai. Machielo en barua ma ne ondiko en owuon ni osiepne machiegni ahinya modak Kolosai, kendo iluonge ni Filemon. Baruano wuoyo kuom Onesimo ma jatij Filemon.

Onesimo ne oringo moweyo Filemon, kendo nobiro Rumi. Onesimo ne owinjo ni Paulo ni e jela Rumi kae. Ne obiro lime, kendo Paulo ne olando wach ni Onesimo. Matin bang’ mano, Onesimo ne obedo Jakristo. Koro Onesimo winjo marach nikech ne oringo. Kuom mano, ing’eyo gima Paulo ndiko e barupe ni Filemon?

Paulo kwayo Filemon ni mondo ong’wonne Onesimo. Paulo ndiko ni: ‘Aore mondo oduog iri. To koro ok en mana jatiji. En owadwa ma Jakristo maber ahinya.’ Ka Onesimo dok Kolosai, oting’o barupe ariyogi, achiel mar Jo-Kolosai to machielo mar Filemon. Wanyalo paro kaka Filemon nyaka bedni mor, bang’ ng’eyo ni jatichne osebedo Jakristo.

Ka Paulo ndiko ni Jo-Filipi kod Filemon, en kod wach maber adier. Owacho ni Jo-Filipi ni: ‘Aoro Timotheo iru. Kata kamano, an bende abiro limou machiegni.’ Kendo ondikoni Filemon kama: ‘Iknae kama anyalo dakie.’

Seche mogony Paulo, olimo owetene kod nyiminene ma Jokristo kuonde mang’eny. Kata kamano, bang’e Paulo itimo mabus e Rumi kendo. Wang’ni to ong’eyo ni idhi nege. Kuom mano, ondiko ni Timotheo, kendo okwaye ni mondo obi mapiyo. Ondikone ni: ‘Asechung’ motegno e nyim Nyasaye kendo obiro miya mich.’ Bang’ higini matin ka oseneg Paulo, Jerusalem iketho kendo, to wang’ni ikethe gi Jo-Rumi.

Kata kamano, nitie weche mang’eny e Muma. Jehova Nyasaye miyo jaote Johana ndiko buge Muma mogik kaachiel gi bug Fweny. Bug Fweny wuoyo kuom ndalo mabiro. We mondo wapuonjre gik madhi timore e ndalo mabiro.