MANO en jaote Petro mochung’ kanyo, to ji man kang’eyego gin osiepene moko. To ang’o momiyo ng’atni kulore ni Petro? Be onego otim kamano? To be ing’eyo ni en ng’a?

En Kornelio. En jatend jolweny mar Jo-Rumi. Kornelio ok ong’eyo Petro. Kata kamano, ne oorne wach mondo orwak Petro e ode. We mondo wane kaka mani ne otimore.

Jolup Yesu mokwongo ne gin Jo-Yahudi, to Kornelio ok en Ja-Yahudi. Kata kamano ohero Nyasaye, okwaye e lamo kinde duto, kendo otimo ng’wono mang’eny ne ji. Odiechieng’ moro malaika birone kendo wachone ni: ‘Nyasaye oheri, kendo obiro dwoko lamo magi. Or ji mondo odhi okel ng’at moro miluongo ni Petro. En Joppa e od Simon modak e dho nam.’

Gikanyono, Kornelio oro ji mondo odhi odwar Petro. Odiechieng’ maluwe, seche ma jogo chopo machiegini gi Joppa, Petro ni e wi tado mopedhore mar od Simon. Ka en kanyo, Nyasaye miyo Petro paro ni oneno law maduong’ kabiro koa e polo. Ei lawno, nitie le ma kitgi opogore. Kaluwore gi chik Nyasaye, le-gi ne ok ler, kendo ne ok onego chamgi, kata kamano dwol moro wachoni: ‘Chung’ malo, Petro. Neg kendo icham.’

‘Ooyo!’ Petro dwoko. ‘Nyaka nene podi ok achamo gima ok ler.’ Kata kamano, dwolno wacho ne Petro ni: ‘Gik ma Nyasaye wacho ni ler kik iluong ni ok ler.’ Mani timore nyadidek. Seche ma Petro wuoro tiend wechegi duto, jogo ma Kornelio ooro chopo e ot, kendo gipenjo kama Petro nitie.

Petro lor piny kendo wacho: ‘An e ng’at ma udwaro. Ubiro nikech ang’o?’ Ka jogo lerone ni malaika ne onyiso Kornelio ni orwak Petro e ode, oyie dhi kodgi. Odiechieng’ maluwe, Petro kod osiepene wuok dhi Kaisaria limo Kornelio.

Kornelio osechoko wedene koda osiepene. Ka Petro chopo, Kornelio romone. Opodho piny, kendo okulore e tiend Petro, mana kaka inyalo neno kae. Kata kamano, Petro wacho ni: ‘Chung’; An bende an mana dhano.’ Ee, Muma wacho ni ok en gima kare kulruok, kendo lamo dhano. Onego walam mana Jehova kende.

Petro koro yalo ne jogo mochokore. Petro wacho ni: ‘Aneno ni Nyasaye oyie gi ji duto madwaro tiyone.’ To ka podi owuoyo, Nyasaye oro roho mare maler, kendo ji chako wuoyo e dhok mopogore opogore. Mani miyo jopuonjre ma Jo-Yahudi ma ne obiro gi Petro wuoro, nikech ne giparo ni Nyasaye oyie mana gi Jo-Yahudi kende. Kuom mano, mani puonjogi ni Nyasaye ok ne oganda moro achiel kaka joma beyo e wang’e maloyo oganda machielo. Donge mani en puonj maber monego waduto waketi e paro?