KAKA ndalo medo sudo, e kaka Yesu medo fwenyore ni jolupne nyading’eny. Chieng’ moro, jopuonjre mage 500 nene. Kane ofwenyore negi, be ing’eyo wach ma Yesu wuoyoe kodgi? Wach pinyruodh Nyasaye. Jehova ne ooro Yesu e piny mondo opuonj wach Pinyruodhno. Kendo omedo timo mano kata mana bang’ chier mare.

Be inyalo paro ni pinyruodh Nyasaye en ang’o? Ee, Pinyruoth en sirkal madier mar Nyasaye e polo, kendo Yesu ema Nyasaye ne oyiero mondo obed ruoth. Kaka wase puonjore, Yesu ne onyiso kaka nobed ruoth maber miwuoro kane omiyo jogo ma kech ne kayo chiemo, kane ochango jo matuwo, kata kane ochiero jo motho!

Kuom mano, e kinde ma Yesu locho kaka ruoth e polo kuom higini gana achiel, piny nobed machalo nade? Ee, piny duto nobed paradis majaber. Lwenje ok nobedie kendo, kata mahundu kata tuoche, kata mana tho. Wang’eyo ni mani en adier nikech Nyasaye ne ochweyo piny mondo obed paradis mondo ji oyud mor. Mano ema omiyo kar chakruok ne ochweyo puodho mar Eden. Kendo gikone, Yesu biro timo gima Nyasaye osebedo kadwaro mondo otimore.

Ndalo koro ochopo mar Yesu dok e polo. Kuom ndalo 40, Yesu osebedo ka fwenyore ne jopuonjrene. Kuom mano, gin gi adiera ni koro ongima kendo. Kata kamano, ka podi ok oweyo jopuonjrene, owacho negi ni: ‘Dong’ uru Jerusalem nyaka uyud roho maler.’ Roho maler en teko mar Nyasaye, machalo kaka yamo makudho, kendo rohono biro konyo jolupne mondo otim dwaro mar Nyasaye. Gikone, Yesu wacho ni: ‘Onego uland wachna e tung’ piny duto.’

Bang’ Yesu wacho kamano, gimiwuoro timore. Ochako idho malo e polo, mana kaka inyalo neno kae. Eka bor polo geng’e mondo kik nene, ma koro jopuonjre Yesu ok nene kendo. Yesu dhi e polo, kendo ochako locho e wi jolupne man e piny.