BE ING’EYO ni dhako koda chwo ariyogo gin jo mage? Dhakono en Mariam Magdalina ma ong’ere maber gi Yesu. To chwo ma nigi lewni marocherego gin malaike. Bur matin ma Mariam ng’iyoni e kama ne oketie ringre Yesu bang’ thone. En liel ma okuny e kor lwanda. Kata kamano, ringre Yesu koro onge! En ng’ano ma okawe? We wane.

Bang’ tho Yesu, jodolo wacho ni Pilato ni: ‘Yesu kane ngima ne owacho ni ibiro chiere bang’ ndalo adek. Kuom mano, koro gol chik mondo orit liende. Eka jopuonjrene ok bi kwalo ringrene mondo giwach ni osechiere a kuom jo motho!’ Pilato nyiso jodolo mondo oor jolweny orit liendno.

Kata kamano, gokinyi mang’ich e odiechieng’ mar adek bang’ tho Yesu, malaika mar Jehova biro apoya nono. Ong’ielo kidi manie dho liel. Jolweny luor ahinya ma ok ginyal sudo. Gikone, ka ging’iyo ei liel, ringre onge! Moko kuom jolwenygo dhi e dala maduong’, kendo ginyiso jodolo. Be ing’eyo gima jodolo marichogo timo? Gimiyo jolwenygo pesa mondo owach miriambo. Jodolo wacho ne jolweny ni: ‘Wachuru ni, jopuonjre mage ne obiro seche mag otieno kane wanindo ma gikwalo ringre mare.’

Kinde ma mago timore, mine moko ma osiepe Yesu limo liel. To mano kaka giwuoro ka giyudo liel ka ni nono! Apoya nono malaike ariyo morwako lewni marieny fwenyore negi. Malaike penjo ni: ‘Ang’o momiyo udwaro Yesu kae? Osechiere. Dhiuru piyo unyis jopuonjrene.’ Mine-go ne oringo matek! Kata kamano, ka gin e yo, ng’at moro chungogi. Be ing’eyo ni en ng’a? En Yesu! Owachonegi ni, ‘Dhiuru uwach ni jopuonjrena.’

Ka mon-go nyiso jopuonjre Yesu ni Yesu ochier, kendo ni gisenene, to ok giyie e yo mayot. Petro gi Johana ringo ka gidhi e liel mondo gine gin giwegi, to giyudo ka liel ni nono! Seche ma Petro gi Johana wuok, Mariam Magdalina dong’ chien. Mano e seche ma Magdalina ng’iyo i bur, kendo oneno malaike ariyogo.

Be ing’eyo gima ne otimore ni ringre Yesu? Nyasaye ne omiyo olal nono. Nyasaye ok ne ochiero Yesu gi ringre dhano ma ne otho godo. Ne omiyo Yesu del manyien mar roho kaka mag malaike manie polo. Kata kamano, mondo omi onyis joote mage ni ongima, Yesu kawo ringre ma ji neno, mana kaka wabiro neno.