E ING’EYO gima jogo kwanyo e lowo kanyo? Ochalo gi pe. Orachar, opadore kendo odonyore e yo mayot. Kata kamano ok en pe; en gima ichamo.

Chiegni dwe achiel ema osekalo nyaka ne Jo-Israel wuog Misri. Gin e thim. Chiemo matin kende ema dongo kanyo, kendo mano miyo ji chako ng’ur kagiwacho ni ‘Madi ne watho e lwet Jehova e piny Misri. Kuno ne wayudo chiemo duto ma ne wadwaro.’

Kuom mano, Jehova wacho ni: ‘Abiro miyo chiemo mondo ochwenu koa e polo.’ Kendo mano ema Jehova timo. Chieng’ ma ne oluwe gokinyi, ka Jo-Israel neno gima rachar to gipenjore ni: ‘En ang’o?’

Musa wachonigi ni: ‘Ma e chiemo ma Jehova omiyou mondo ucham.’ Ji ne oluongo chiemono ni MANNA. Ndhandhune chalo gi makate molos gi mor kich.

Musa wacho ne ji ni: ‘Chokuru moromo ng’ato ka ng’ato chamo.’ Omiyo mano ema gitimo okinyi ka okinyi. Bang’e, ka chieng’ rieny matek, manna ma ne dong’ piny ne leny to rumo.

Musa bende wachonigi ni: ‘Ng’ato kik owe manna moro nyaka e odiechieng’ maluwe.’ Kata kamano, jomoko kuomgi ok winji. Be ing’eyo gima timore? Okinyi maluwe, manna ma ne gikano chako ng’we kendo otimo kudini!

Kata kamano, nitie odiechieng’ moro achiel ma Jehova nyiso ji mondo ochok manna nyadiriyo. Mani en odiechieng’ mar auchiel. Kendo Jehova wacho ni gikan moko nyaka kinyne nikech ok obi miyogi moko e odiechieng’ mar abiriyo. Ka gikane nyaka odiechieng’ mar abiriyo, ok obed mang’we kata kudini ok bedie! Mani en hono moro machielo!

Higini duto ma Jo-Israel ni e thim, Jehova pidhogi kod manna.