BE INENO gima timore kae? Magi duto gin jolweny mag Israel. Joma okulorego modho pi. Gideon ma jang’ad bura e ng’at mochung’ machiegni kodgino. Ong’iyo kaka gimodho pi.

Ng’i ane maber kaka jogi modho pi e yore mopogore opogore. Jomoko kuomgi modho ka lela wang’gi ochomo pi. To achiel kuomgi tuomo pi gi lwetene, eka mondo one gik ma timore e alwora mare. Mani en gima ber ahinya, nikech Jehova ne onyiso Gideon mondo oyier mana jogo ma modho pi ka ng’iyo malo. Nyasaye nowacho ni mondo oriemb ji mamokogo odog dala. We wane gimomiyo.

Jo-Israel odonjo e chandruok mang’eny ahinya kendo. Mani timore nikech ok gisebedo ka giluwo chik Jehova. Jo-Midian osebedo gi teko e wigi, kendo gihinyogi. Kuom mano, Jo-Israel yuak ni Jehova mondo okonygi, kendo Jehova winjo yuakgi.

Jehova nyiso Gideon mondo oikore gi jolweny, omiyo Gideon choko jolweny 32,000 kanyachiel. Kata kamano, jolweny 135,000 dwaro kedo kod Israel. To ema podi Jehova nyiso Gideon ni: ‘In kod ji mang’eny ahinya.’ Ang’o momiyo Jehova nowacho kamano?

En nikech ka Israel oloyo lweny, ginyalo paro ni giloyo lwenyno nikech tekogi giwegi. Ginyalo paro ni ne ginyalo locho ma ok giyudo kony moa kuom Jehova. Kuom mano, Jehova wacho ni Gideon ni: ‘Nyis ji duto ma oluor ni mondo gidog dala.’ Ka Gideon timo mano, jolweny 22,000 ma mage dok dala. Koro odong’ mana gi jolweny 10,000 ma onego oked kod jolweny 135,000 mag wasikgi.

Pod winj! Jehova wacho ni: ‘Podi in kod joma ng’eny ahinya.’ Kuom mano, onyiso Gideon mondo okel ji mondo omodh pi e aorani, kendo mondo oduok dala jogo duto ma modho kochwoyo dhogi e pi. Jehova singorene kama: ‘Anami loch kod ji 300 ma ne omodho pi kang’icho.’

Koro kinde chopo mar kedo e lweny. Gideon pogo joge 300 e grube adek. Bang’ mano, omiyo ng’ato ka ng’ato tung’ kod agulu man gi rameny e iye. Kochopo chuny otieno, giduto gilworo kambe mag wasikgi. Bang’e, giduto karachiel gikudho tungegi, kendo gigoyo agulnigi ka gikok kama: ‘Ligangla mar Jehova gi mar Gideon!’ Seche ma jolweny ma wasikgi ochiew, kihondko omakogi, kendo giluor. Giduto gichako ringo kendo Jo-Israel loyo lweny.