MUSA dwaro ni mondo odonj Kanaan gi Jo-Israel. Kuom mano, okwayo ni: ‘Jehova, we mondo ang’ad Aora Jordan, mondo aneye piny maberno.’ Kata kamano, Jehova wachone ni: ‘Mano oromo! Kik ichak iwuo e wi wachno kendo!’ Be ing’eyo gimomiyo Jehova ne owacho kamano?

En nikech gima ne otimore kane Musa ogoyo lwanda. Par ni Musa kod Harun ne ok omiyo Jehova duong’. Ne ok ginyiso ji ni Jehova ema ne ogolo pi e lwandano. Nikech mano, Jehova ne owacho ni ok ne odhi weyogi mondo gidonj e piny Kanaan.

Koro, dweche moko matin bang’ tho Harun, Jehova nyiso Musa ni: ‘Kaw Joshua, kendo ichunge e nyim Eleazar ma jadolo koda e nyim ji. To kanyo, e nyim ji duto, inyisgi ni Joshua e jatelo manyien.’ Musa timo mana kaka Jehova owacho, mana kaka ineno e pichano.

Kendo Jehova nyiso Joshua: ‘Bed motegno, kendo kik iluor. Inikel Jo-Israel e piny Kanaan ma ne asingora ni namigi, kendo anabed kodi.’

Bang’e Jehova nyiso Musa ni mondo oidh nyaka e wi Got Nebo e piny Moab. Ka en ewi godno, Musa ng’iyo loka Aora Jordan, kendo onyalo neno piny maber mar Kanaan. Jehova wacho ni: ‘Ma e piny ma ne asingora ni nami nyithind Ibrahim, Isaka gi Jakobo. Aseyieni mondo inene, to ok abi weyi mondo idonjie.’

E wi Got Nebo kanyo ema Musa thoe. Ne en ja higini 120 kane otho. Ne podi otek, kendo wengene ne podi ok ochido. Ji kuyo ahinya, kendo giyuak nikech Musa otho. Kata kamano, gimor bedo gi Joshua kaka jatendgi manyien.