NE MAUPE kod olembe moloth e ludhni. Ma en ludh Harun. Maupegi koda olembe mochiekgo, odongo e ludh Harun e otieno achiel kende! We mondo wane gimomiyo.

Jo-Israel osebedo ka wuotho awuotha e thim kuom kinde mogwaro koro. Jomoko kuomgi neno ni Musa ok onego obed jatendgi to kata ni Harun ok onego obed jadolo maduong’. Kora en achiel kuom jogo maparo kamano. Dathan, Abiram koda ji 250 ma jotelo, bende neno kamano. Giduto ne giwacho ni Musa niya: ‘Ang’o momiyo uting’oru e wiwa?’

Musa nyiso Kora gi joma luwe ni: ‘Kiny gokinyi ukaw tape magu kendo uketie ubani. Bang’e, ubi kodgi e tabanakel mar Jehova. Wabiro neno ni ng’at mane ma Jehova biro yiero.’

Kinyne, Kora kod jolupne 250 obiro e tabanakel. Ji mang’eny bende obiro mondo oriwgi lwedo. Mirima omako Jehova ahinya. Musa wacho niya: ‘Auru e hembe mag joma richogi. Kik umul gimoro amora margi.’ Ji winjo, kendo giwuok e hembe mag Kora, Dathan koda Abiram.

Eka Musa wacho kama: ‘Kaluwore gi gik mabiro timore, unung’e ni en ng’at mane ma Jehova oyiero. Piny biro barore kendo biro mwonyo jo marichogi.’

Musa ka tieko wuoyo ni i, to piny barore. Hema mar Kora gi mwandune, Dathan, Abiram kod jogo duto ma riwogi lwedo, piny mwonyo. Ka ji winjo yuak mar joma lowo yiko, giwacho ni: ‘Waringi! Piny nyalo mwonyowa wan bende!’

Kora kod joge 250 podi ni machiegni gi tabanakel. Kuom mano, Jehova oro mach, kendo giduto giwang’. Bang’e Jehova wacho ni Eleazer wuod Harun mondo okaw tepe ubani mag jogo motho, mondo olosgo raum mar altar. Raum altar-no en ranyisi ne Jo-Israel, ni onge ng’at machielo mak mana Harun gi yawuote ma onego oti kaka jodolo ni Jehova.

Kata kamano, Jehova dwaro nyiso maler ni Harun kod yawuote ema oseyiero mondo obed jodolo. Kuom mano, owacho ni Musa niya: ‘Kaw luth kuom jotend dhoudi duto mag Israel. Kuom dhood Lawi, kaw ludh Harun. Kendo ket ludhegi e tabanakel e nyim sandug singruok. Ludh ng’at ma ayiero kaka jadolo biro golo maupe.’

Kinyne gokinyi, ka Musa rangogi, Ludh Harun ogolo maupe kendo ogolo olemb mlozi! Be koro ineno gimomiyo Jehova ne omiyo ludh Harun ogolo mauwa?