KA JO-ISRAEL donjo e chandruok, giyuak ne Jehova. Jehova miyogi dwoko e yor miyogi jotelo ma jochir mondo okonygi. Muma luongo jotelogi ni jong’ad bura. Joshua ema ne en jang’ad bura mokwongo, to moko kuom jong’ad bura ma ne obetie bang’e, ne gin Othniel, Ehud kod Shamgar. To ariyo kuom joma miyo Israel kony gin mine miluongo ni Debora kod Jael.

Debora en janabi madhako. Jehova miye weche manyiso gik mabiro timore, kendo onyiso ji gik ma Jehova owacho. Debora bende en jang’ad bura. Ojabet e tiend yadh othidhe moro e piny motimo gode, kendo ji biro ire mondo okonygi e chandruokgi.

E kindeni, Jabin e ruodh Kanaan. En kod geche 900 mag lweny. Jolweny mage nigi teko ahinya, kendo gichuno Jo-Israel mondo obed jotij Jabin. Jatend jolweny mag Ruoth Jabin iluongo ni Sisera.

Chieng’ moro, Debora noluongo Jang’ad bura ma Barak mowachone ni: ‘Jehova osewacho kama: “Kaw chwo 10,000, kendo idhi kodgi nyaka Got Tabor. Abiro kelo Sisera iri kanyo. Kendo anamiyi loch e wiye koda e wi jolweny mage.”’

Barak wachoni Debora kama: ‘Anyalo mana dhi ka in bende idhi koda.’ Debora dhi kode, to kata kamano onyiso Barak ni: ‘Lwenyni ok nokelni pak, nikech Jehova biro chiwo Sisera e lwet dhako.’ Kendo mano e gima timore.

Barak koro lor koa e Got Tabor mondo odhi orom kod jolweny mag Sisera. Apoya nono, Jehova kelo ataro, kendo jolweny mang’eny tho e pi. Kata kamano, Sisera olor e gache, kendo oringo.

Bang’ kinde matin, Sisera obiro e hemb Jael. Jael rwake e hema, kendo omiye chak mondo omadhi. Mani miyo ochako nur, kendo bang’ kinde matin nindo tere. Jael kawo loch migurogo hema, kendo ogurogo wi ng’at marachni. Bang’e, ka Barak biro, onyise Sisera ma koro osetho! Kuom mano, inyalo neno ni, gima Debora nowacho ema ne otimore.

Gikone, Ruoth Jabin bende inego, kendo Jo-Israel bedo gi kuwe kuom kinde matin.