HIGINI kalo—higini 10, higini 20, higini 30, higini 39! To Jo-Israel podi ni e thim. Kata kamano, e higinigi duto, Jehova rito joge. Opidhogi gi manna. Otelonigi odiechieng’ gi siro mar bor polo, to gotieno otelonigi gi siro mar mach. Kendo e higinigi duto, lepgi ok ti, kendo tiendegi bende ok bed kod adhonde.

Koro en dwe mokwongo mar higa mar 40 nyaka ne gia Misri. Jo-Israel ogoyo kambi e piny Kadesh kendo. Ma e kama ne gintie kane oor ji 12 odhi onon piny Kanaan chiegni higini 40 mosekalo. Miriam, ma nyamin Musa tho e piny Kadesh. To mana kaka ne osetimore, kae bende chandruok nenoe.

Pi otamo ji yudo kamoro amora. Kuom mano, koro ging’ur ne Musa niya: ‘Ne dobedo maber ka dine watho. Ang’o momiyo nigolowa Misri kikelowa e piny marachni ma gimoro ok nyal dongoe? Onge cham, mzabibu, ng’owo kod olembe moko. Onge kata pi modho matin.’

Kane Musa gi Harun odhi e tabanakel lemo, Jehova ne onyiso Musa: ‘Chok ji kamoro achiel. Eka iwuo kod lwanda man kacha, kendo itim kamano e nyim ji duto. Pi biro wuok kuome maromo ji duto kod jambgi.’

Kuom mano, Musa choko ji, kendo onyisogi ni: ‘Winjuru, un joma onge gi yie kuom Nyasaye! Ochuno ni nyaka an gi Harun wagolnu pi koa e lwandani?’ Bang’e Musa goyo lwandano nyadiriyo gi ludhe, kendo aora maduong’ mar pi chako mol kawuok e lwandano. Pi koro bedo mang’eny maromo ji duto kaachiel gi jamni modho.

Kata kamano, Jehova iye owang’ gi Musa kod Harun. Be ing’eyo gimomiyo? En nikech Musa gi Harun owacho ni gin ema gidhi golo pi e lwanda. To kuom adiera, Jehova ema ne otimo mano. To nikech Musa gi Harun ne ok owacho adiera kuom gima ne dhi timore, Jehova wacho ni obiro miyogi kum. Onyisogi ni: ‘Ok ubi telo ni joga nyaka piny Kanaan.’

Bang’ kinde matin, Jo-Israel oa Kadesh ma gichopo e Got Hor. Harun tho e wi godno. Ne en jahigini 123 kane otho. Jo-Israel okuyo ahinya, kendo giyuage kuom ndalo 30. Eleazar ma wuode, ema bedo jadolo mar oganda Jo-Israel.