NE! JO-ISRAEL ng’ado Aora Jordan! To ere pi aora? Nikech en kinde higa ma koth chweye ahinya, e dakika matin mosekalo noyudo ka pi opong’o aora. Kata kamano, koro pi duto oduono! Kendo Jo-Israel koro ng’ado ka wuotho kama otwo mana kaka ne gitimo e Nam Makwar! Pi duto odhi kanye? We mondo wane.

Kane ochopo kinde ma Jo-Israel dwaro ng’ado Aora Jordan, ma e wach ma Jehova ne omiyo Joshua mondo onyis ji: ‘Jodolo onego okaw sandug singruok mondo gitelnwa. Ka tiendegi onyono pi Aora Jordan, aorano biro chok.’

Kuom mano, jodolo kawo sandug singruok, kendo giting’e ka gitelo e nyim ji. Ka gichopo e Aora Jordan, jodolo nyono pi. Aorano ringo (mol) matek, kendo otut ahinya. To kane tiendegi onyono anyona pi ni i, pi chako duono! En hono! Jehova ogeng’o pi gi ku ma pi ae. Kuom mano, bang’ seche manok, pi bedo maonge e aora!

Jodolo mating’o sandug singruok donjo nyaka e dier aora. Be inyalo nenogi e pichano? Seche ma gichung’ kanyo, Jo-Israel duto ng’ado Aora Jordan ka giwuotho e wi lowo motwo!

Ka ji duto oseng’ado, Jehova nyiso Joshua ni mondo owach ni ji 12 maroteke ni: ‘Donjuru e aora kama jodolo ochung’ie gi sandug singruok. Ukwany kite 12, kendo uchung-gi kaachiel kama ubiro nindoe gotienoni. Eka mondo e kinde mabiro, ka nyithindu openjou tiend kitego, onego unyisgi ni pi ne oweyo mol ka sandug singruok mar Jehova ne ng’ado Aora Jordan. Kitego noparnu hononi!’ Joshua bende keto kite 12 kama jodolo ne ochung’ie e aora.

Mogik, Joshua nyiso jodolo mating’o sandug singruok ni: ‘Wuoguru e aora Jordan.’ Ka gitimo kamano, aora kendo chako mol.