BE ING’EYO nying ng’at ma ratego moloyo ji duto ma osedak e pinyni? En jang’ad bura miluongo ni Samson. Jehova ema miyo Samson teko. Kata ka podi ok onyuol Samson, Jehova nyiso min mare ni: ‘E kinde machiegini, ibiro nyuolo wuowi. Obiro telo e reso Jo-Israel e lwet Jo-Filistia.’

Jo-Filistia gin joma richo modak Kanaan. Gin kod jo lweny mang’eny, kendo gihinyo Jo-Israel ahinya. Chieng’ moro ka Samson dhi kama Jo-Filistia odakie, sibuor maduong’ maruto matek chomo ire. Kata kamano, Samson nego sibuorno mana gi lwete nono. Onego Jo-Filistia mang’eny bende.

Bang’e, Samson hero dhako moro miluongo ni Delila. Jotend Jo-Filistia singore ni Delila ni ng’ato ka ng’ato kuomgi biro miye fedha 1,100 ka onyisogi gima miyo Samson nigi teko mang’eny ahinya. Delila dwaro pesano duto. Ok en osiep Samson madier kata mana mar oganda Nyasaye. Kuom mano, koro osiko openjo Samson gima miye obedo gi teko ahinya.

Gikone, Delila miyo Samson nyise gima miye obedo gi teko ahinya. Samson wachone kama: ‘Yie wiya ne podi ok oliel. Nyaka a nyuolna, Nyasaye ne oyiera mondo abed jatichne makende miluongo ni Ja-Nazir. Ka oliel wiya, to tekona nyalo lal.’

Delila ka ng’eyo wachni, omiyo Samson nindo e bambene. Bang’e, oluongo ng’ato mondo obi oliel wi Samson. Ka Samson chiew, tekone orumo. Bang’e, Jo-Filistia biro, kendo gimake. Gigolo wengene ariyo duto, kendo gitime misumbagi.

Chieng’ moro, Jo-Filistia bedo gi nyasi moro maduong’ mar lamo nyasachgi ma Dagon, kendo gigolo Samson e jela mondo gitimne timbe mag jaro. Koro yie wi Samson osetwi kendo. Samson nyiso wuowi ma ne omako lwete ka taye niya: ‘We mondo amul sirni mag ot.’ Bang’e, Samson lamo Jehova ka kwaye teko kendo omako sirni mag odno. Ne oyuak kowacho niya: ‘We mondo atho gi Jo-Filistia gi.’ Nitie Jo-Filistia 3,000 e nyasino, kendo ka Samson ne olung’ore e sirni-go gi tekone duto, ot ne opodho monego jo marichogi duto.