BE ISETIMOE singruok moro ma kendo bang’e iyudo ni ok inyal chope? Ng’at ma ineno e pichani ne otimo kamano, kendo mano e momiyo okuyo ahinya. En jang’ad bura ma jachir mar Jo-Israel miluongo ni Jeftha.

Jeftha odak e kinde ma Jo-Israel oseweyo lamo Jehova. Gitimo gik maricho kendo. Kuom mano, Jehova oweyo Jo-Amon mondo ohinygi. Mani miyo Jo-Israel yuak ni Jehova kawachone ni: ‘Waseketho e nyimi. Kiyie, reswa!’

Ji winjo marach nikech gik maricho ma gisetimo. Lit ma gin-go miyo gilamo Jehova kendo. Timo mano miyo Jehova kendo konyogi.

Ji oyiero Jeftha mondo oked kod joma richo ma Jo-Amon. Jeftha dwaro ahinya ni mondo Jehova okonye e lweny. Kuom mano, osingore ni Jehova kama: ‘Ka imiya loch e wi Jo-Amon, ng’at ma nokwong romona kawuok e oda seche ma aduogo, anamiyi.’

Jehova winjo singruok mar Jeftha, kendo okonye loyo lweny. Ka Jeftha duogo dala, be ing’eyo ni en ng’ano ma ne okwongo biro mondo oromne? En nyare, ma bende en nyathine achiel kende. Jeftha yuak kawacho ni: ‘A nyara! Mani kuyo manade mikelo kuomani. Kata kamano, asetimo singruok ni Jehova kendo ok anyal dok chien.’

Ka nyar Jeftha winjo wach singruokno, en bende okuyo mokwongo nikech mani nyiso ni obiro weyo wuon mare koda osiepene. Kata kamano, obiro tiyo gi ngimane modong’ e tij Jehova e tabanakel mare man Shilo. Kuom mano, onyiso wuon mare niya: ‘Kane isesingori ni Jehova, nyaka irit singruokno.’

Koro nyar Jeftha dhi Shilo, kendo otiyo tij Jehova kuom ndalo duto mag ngimane e tabanakel mare. Ndalo ang’wen e higa, mond Israel dhi lime kanyo, kendo gibedo gi thuolo mar budho kode maber. Ji ohero nyar Jeftha nikech en jatich Jehova maber ahinya.