BE THUOL monalore e yadhno chalo gi thuol madier? Ok en mar adier. En thuol molos gi mula. Jehova ne onyiso Musa ni mondo ong’awe e yadhno mondo ji ong’iye eka gimed bedo mangima. Kata kamano, thuonde mamoko man pinygo to ngima. Gisekayo ji, ma ji obedo matuwo. Be ing’eyo gimomiyo?

En nikech Jo-Israel osewuoyo marach e wi Nyasaye gi Musa. Ging’ur ni: ‘Ang’o momiyo nigolowa e piny Misri mondo wabi watho e thimni? Kae onge chiemo kata mana pi. To manna-ni, osejogowa ma ok wanyal dhi nyime gi chame kendo.’

Kata kamano, manna-no en chiemo maber. Jehova omiyogi e yor hono. To kendo e yor hono, omiyogi nyaka pi. Kata kamano, ji ok nyis erokamano kuom rit ma Nyasaye oseritogigo. Kuom mano, Jehova oro thuondegi man kod sum mondo omi godo Jo-Israel kum. Thuondego kayogi kendo ji mang’eny kuomgi tho.

Gikone, ji biro ir Musa kendo giwacho niya: ‘Waseketho, nikech ne wawuoyo marach kuom Jehova kendo kuomi bende. Koro, lamnwa Jehova mondo ogol thuondegi.’

Kuom mano, Musa koro lemo ne ji. Kendo Jehova nyiso Musa ni mondo olos thuond mulani. Owacho ni mondo ong’awe e yath, kendo ng’ato ang’ata ma thuol okayo, onego ong’iye. Musa timo mana gima Nyasaye owacho. To joma ne thuol okayo ne ng’iyo thuol molos gi mulano kendo gichango.

Nitie puonj ma wayudo kuom wachno. Waduto wachalo gi Jo-Israel ma ne thuondego okayo. Waduto watho. Rang ane e piny, kendo ibiro neno ni wati, wabedo matuwo, kendo watho. Mano timore nikech dichwo gi dhako mokwongo, Adam gi Hawa, ne oweyo Jehova to waduto wan nyithindgi. Kata kamano, Jehova oseloso yo mondo wadag nyaka chieng’.

Jehova ne ooro Wuode Yesu Kristo e piny. Ne olier Yesu e yath nikech ji mang’eny ne paro ni ne en ng’at marach. Kata kamano, Jehova ne ochiwo Yesu mondo owarwa. Ka waketo geno marwa kuome, kendo ka waluwo bang’e, to wanyalo bedo gi ngima ma nyaka chieng’. Kata kamano, wabiro puonjore mang’eny kuom wachni bang’e.