DONGE mae en wuowi ma jachia? Nyinge en Samuel. To ng’at moketo lwete e wi Samuel, en jadolo maduong’ e Israel ma nyinge Eli. Mago gin jonyuol Samuel, Elkana gi Hanna, ma okele ir Eli.

Samuel en jahigini ang’wen kata abich kende. Kata kamano, obiro dak gi Eli e tabanakel mar Jehova kaachiel gi jodolo mamoko. Ang’o ma ne nyalo miyo Elkana gi Hanna ochiw nyathi matin kaka Samuel mondo oti ne Jehova e tabanakel? We mondo wane.

Higini matin mosekalo ka mani ne podi ok otimore, Hanna ne okuyo ahinya. Mano ne en nikech ne ok onyal nyuol to ne odwaro nyathi ahinya. Kuom mano, chieng’ moro ka Hanna ne odhi e tabanakel mar Jehova, ne olemo kama: ‘A Jehova, wiyi kik wil koda! Ka imiya nyathi ma wuowi, asingora ni anamiyigo mondo otini kuom ngimane duto.’

Jehova ne odwoko lamo mar Hanna, kendo dweche moko bang’e ne onyuolo Samuel. Hanna ne ohero wuode matinno, kendo ne ochako puonje wach Jehova kane podi otin ahinya. Ne onyiso chwore kama: ‘Ka Samuel odongo ma ochopo kama oweyo dhoth, anatere e tabanakel mondo oti ne Jehova kanyo.’

Mani e gima waneno Hanna gi Elkana ka timo e pichano. To nikech Samuel osepuonj maber gi jonyuolne, en gi mor mar tiyo ni Jehova e hema mare. Higa ka higa, Hanna gi Elkana biro lemo e hema makendeni kaachiel gi limo wuodgi matinno. Kendo higa ka higa Hanna ne kelo ni Samuel arwaka matin manyien ma ne olosone.

Kaka higini medo dhi, e kaka Samuel bende dhi nyime gi tich e tabanakel mar Jehova, kendo ihere gi Jehova, to ji bende here. Kata kamano, Hofni gi Finehas ma gin yawuot Eli jadolo maduong’, ok gin joma beyo. Gitimo gik mang’eny maricho, kendo gimiyo jomoko bende ketho chik Jehova. Eli onego golgi e tij bedo jodolo, to ok otim kamano.

Samuel ok we gik maricho matimore e tabanakel mondo otame dhi nyime tiyo ne Jehova, kata obedo ni podi otin. To nikech joma tin ahinya ema ohero Jehova kuom adier, kinde osekalo mang’eny ka podi Jehova ok owuoyo kod dhano moro amora. Ka Samuel osedongo matin, gima timore en ma:

Samuel nindo e tabanakel seche ma dwol moro chiewe. Odwoko ni: ‘Antie.’ Kendo ochiew modhi ir Eli koringo kendo owachone ni: ‘An kae, nikech iluonga.’

To Eli dwoke ni: ‘Ooyo, ok aluongi; dogi mondo inind.’ Kuom mano, Samuel dok e nindo.

Nitie dwol mar ariyo kendo: ‘Samuel!’ Omiyo Samuel chung’ to ringo nyaka ir Eli kendo. ‘An kae, nikech iluonga,’ Samuel wacho. Eli to dwoke ni: ‘Ooyo, ok aluongi wuoda. Dhi mondo inind kendo.’ Kuom mano, Samuel odok e pien.

Dwol luongo mar adek kendo, ‘Samuel!’ Omiyo Samuel ringo ir Eli. Owachone ni, ‘An kae, nyaka bed ni koro to iluonga.’ Eli fwenyo ni nyaka bed ni Jehova ema luonge. Kuom mano, onyiso Samuel ni: ‘Dhi mondo inind kendo, to ka iwinjo dwol maluongi kendo to nyaka idwok ni: “Wuo, Jehova, nikech jatichni winjo.”’

Mani e gima Samuel wacho ka Jehova oluonge kendo. Kendo Jehova nyiso Samuel ni obiro kumo Eli kod yawuote. Bang’e, Hofni kod Finehas tho e lweny e kindgi gi Jo-Filistia, kendo ka Eli winjo gima otimore, opodho kendo ng’ute tur ma en bende otho. Kuom mano, wach Jehova timore adier.

Samuel obedo maduong’, kendo obedo jang’ad bura mogik e piny Israel. Ka koro oseti, ji kwaye ka wachone ni: ‘Yiernwa ruoth mondo obed gi loch e wiwa.’ Samuel ok dwar timo mani, nikech kuom adier Jehova e ruodhgi. Kata kamano, Jehova nyise ni mondo owinj jogo.