BE ING’EYO dhako ma jachia ma biro romo gi Daudi e pichani? Nyinge en Abigail. En kod chuny maber, kendo ogeng’o Daudi kik tim gima rach. Kata kamano, ka podi ok wapuonjore wachno, we mondo wane gik ma osebedo katimore ni Daudi.

Bang’ Daudi ringo a kuom Saulo, opondo e rogo. Owetene kod joodgi mamoko, riwore kode kanyo. Chiegni ji manyalo chopo 400 biro ire, kendo Daudi bedo jatendgi. Daudi bang’e dhi ir ruodh Moab to wachone ni: ‘Kiyie we mondo wuonwa koda minwa odag kodi ka podi arito gima biro timorena.’ Bang’e Daudi gi joge ma chwo chako dak e gode ka gipondo.

Bang’ mano ema koro Daudi romo kod Abigail. Nabal ma chwore en jamwandu ma nigi lowo maduong’ ahinya. En gi rombe 3,000 koda diek 1,000. Nabal en ng’at ma iye lit. Kata kamano, Abigail chiege en dhako ma jachia ahinya. Bende ong’eyo timo gima ni kare. Chieng’ moro bende ne oreso ngima joode. We wane kaka ne otimo mano.

Daudi gi joge osebedo kanyiso Nabal ng’wono ahinya. Gisekonye rito rombene. Kuom mano, chieng’ moro, Daudi oro joge moko mondo okwa kony kuom Nabal. Joote Daudi biro ir Nabal seche ma gilielo yie rombe. En chieng’ nyasi mar chiemo, kendo Nabal ni kod gik mang’eny michamo. Kuom mano, ma e gima joote Daudi wacho: ‘Wasebedo ka wanyisi ng’wono. Ne ok wakwalo rombeni kata achiel to wase konyo e ritogi. Koro, kiyie miwa chiemo.’

Nabal wacho ni: ‘Ok abi chiwo chiemba ni ji machalo kodu.’ Owuoyo e yor ich lit, kendo owacho weche maricho kuom Daudi. Ka joote Daudi duogo kendo nyiso Daudi gik ma Nabal owacho, Daudi iye wang’ ahinya. Onyiso joge ni, ‘Kaw uru ligangla magu.’ Kendo gichako wuoth ka gidhi nego Nabal gi joge.

Achiel kuom jotich Nabal ma nowinjo gik ma ne Nabal wacho, ne odhi ma onyiso Abigail. Gikanyono, Abigail loso chiemo. Oting’ogi e wi punde, kendo ochako wuoth ka odhi. Ka oromo gi Daudi, olor e punda, okulore kowacho ni: ‘Kiyie ruodha kik imak weche mag Nabal chwora. En ng’at mofuwo, kendo otimo gik mofuwo. Akeloni mich. Kiyie kawe, kendo ng’won-nwa kuom gima ne otimore.’

Daudi dwoko ni: ‘In dhako mariek. Imiyo ok anego Nabal, mondo achule kuom bedo gi ich lit ma en go. Koro dhi dala gi kuwe.’ Bang’e, ka Nabal tho, Abigail bedo achiel kuom mond Daudi.