BANG’ Daudi chako locho ka en Jerusalem, Jehova miyo jolweny mag Daudi loyo lwenje mang’eny e wi wasikegi. Jehova ne osesingo ni obiro miyo Jo-Israel piny Kanaan. To koro, gi kony moa kuom Jehova, piny duto ma ne osingnegi, gikone bedo margi.

Daudi en jatelo maber. Ohero Jehova. Kuom mano, achiel kuom gik mokwongo timo bang’ kawo Jerusalem, en kelo sandug singruok mar Jehova kanyo. Kendo odwaro gero hekalu mondo oket sandugno e iye.

Daudi ka bedo maduong’ moromo, otimo gima rach ahinya. Daudi ong’eyo ni kawo gir ng’ato en tim marach. Kata kamano, odhiambo moro ka en e wi tat ode, ong’iyo piny, kendo oneno dhako moro ma jachia ahinya. Nyinge Bathsheba, to chwore en achiel kuom jolweny mag Daudi, kendo nyinge Uria.

Daudi dwaro Bathsheba ahinya, omiyo ooro mondo okele e ode. Chwore ni e lweny. Daudi nindo kode, kendo bang’e Bathsheba fwenyo ni omako ich. Chuny Daudi chandore ahinya, omiyo ooro wach ni Joab, ma en jatend jolweny, ni mondo oket Uria e nyim jolweny kama ibiro nege. Uria kane otho, Daudi ne okendo Bathsheba.

Jehova iye owang’ ahinya kod Daudi. Kuom mano, ooro jatichne ma Nathan mondo onyise richone. Inyalo neno Nathan kanyo ka wuoyo gi Daudi. Chuny Daudi winjo malit ahinya nikech gima otimo, omiyo Jehova ok nege. Kata kamano, Jehova wachone ni: ‘Nikech isetimo gik marichogi, ibiro bedo gi chandruok mang’eny ahinya e odi.’ To mano kaka Daudi bedo gi chandruok!

Mokwongo, nyathi ma wuod Bathsheba tho. Bang’e, wuod Daudi makayo ma nyinge Amnon chuno Tamar nyamin mare mondo onind kode. Absalom wuod Daudi iye wang’ ahinya nikech gima otimoreno, ma onego Amnon. Bang’e, Absalom miyo ji mang’eny here, kendo omiyo gikete ruoth. Gikone, Daudi locho e lweny e kinde gi Absalom, kendo inego Absalom. Ee, Daudi nikod chandruok mang’eny ahinya.

Kinde ma gigi duto timore, Bathsheba nyuolo nyathi ma wuowi ma nyinge Solomon. Daudi ka bedo moti kendo matuwo, Adonija wuode temo ketore ruoth. Kuom mano, Daudi chiko jadolo ma nyinge Zadok ool mo e wi Solomon, mondo onyis ni Solomon ema nobed ruoth. Bang’e matin, Daudi tho ka en jahigini 70. Ne otelo kuom higini 40, to koro Solomon e ruodh Israel.