SAULO temo mako Daudi kendo. Okawo jolweny mage 3,000 mabeyo ahinya, kendo giwuok ka gidhi manye. Daudi ka winjo wachni, ooro ji ling’ling’ mondo onon ane kama Saulo gi joge ogoye kambi otienono. Bang’e, Daudi penjo ariyo kuom joge niya: ‘Ng’ano kuomu mabiro dhi koda e kambi mar Saulo?’

Abishai dwoke ni: ‘Abiro dhi kodi.’ Abishai en wuod Zeruia nyamin Daudi. Seche ma Saulo gi joge nindo, Daudi gi Abishai donjo mos e kambi-no. Gikawo tong Saulo kod jagi mare mar pi ma oketo e bath wiye. Onge ng’ama nenogi kata winjogi, nikech giduto gin e nindo matut.

Koro ne ane Daudi gi Abishai. Giseringo ma koro gin e wi got matin. Daudi kok ne jatend lweny mar Jo-Israel kama: ‘Abner, ang’o momiyo ok irito ruoth ma jatendi? Ne! Tonge koda jagi mare mar pi ni kanye?’

Saulo koro chiew. Owinjo dwond Daudi, kendo openjo ni: ‘Mano in Daudi?’ Be inyalo neno Saulo gi Abner ka gin piny kanyo?

‘Kamano ruodha,’ Daudi dwoko Saulo. Kendo Daudi penjo ni: ‘Ang’o momiyo itemo maka? Ang’o ma atimoni marach? Tongi eri ni kae, A ruoth. Or achiel kuom jogi obi oome.’

Saulo wacho ni: ‘Asetimo gima rach. Atimo gik moko e yo ma ofuwo.’ Bang’ mano Daudi dhi yore, kendo Saulo dok dala. Kata kamano, Daudi wacho kende ni: ‘Chieng’ moro achiel, Saulo biro nega. Onego aringi adhi e piny Jo-Filistia.’ Kendo mano e gima otimo. Daudi pondo ni Jo-Filistia e rieko, kendo omiyo giparo ni koro oriwogi lwedo.

Bang’ ndalo, Jo-Filistia dhi kedo e lweny gi Jo-Israel. E lwenyno, inego Saulo kaachiel kod Jonathan. Mani miyo Daudi kuyo ahinya, kendo ondiko wer majaber ma owero ni: ‘Akuyo nikech in owadwa Jonathan. Ne in ng’at ma ageno!’

Bang’ mano, Daudi dok Israel e dala mar Hebron. Lweny betie e kind jogo madwaro ni Ishbosheth wuod Saulo ema mondo obed ruoth, kod jogo madwaro ni Daudi ema obed ruoth. Kata kamano, jogo man kor Daudi ema locho. Daudi en jahigini 30 kinde ma okete ruoth. Kuom higini abiriyo gi nus, otelo ka en Hebron. Moko kuom yawuote ma inyuolone ka en kuno gin, Amnon, Absalom kod Adonija.

Ndalo koro chopo ma Daudi kod joge dhi mondo gikaw dala majaber miluongo ni Jerusalem. Zeruia ma nyamin Daudi ni kod wuode moro ma nyinge Joab, kendo en ema otelo e lwenyno. Kuom mano, Daudi keto Joab obed jatend jolweny mage. Koro Daudi chako locho kaka ruoth e dala mar Jerusalem.