JO-FILISTIA obiro kedo gi Jo-Israel kendo. Owete Daudi madongo adek koro gin jolweny mag Saulo. Kuom mano, chieng’ moro Jesse wacho ne Daudi ni: ‘Kaw cham kod makate iter ni oweteni. Dhi ine ane kaka gin.’

Daudi kochopo e kambi jolweny, oringo ka odhi kar lweny mondo one owetene. Ratego mogangore ma Ja-Filistia miluongo ni Goliath, biro e nyim Jo-Israel, kendo ojarogi. Osebedo ka otimo mani okinyi kokinyi, kendo odhiambo kodhiambo kuom ndalo 40. Okok matek ni ‘Yier uru ng’ato achiel kuomu mondo oked koda. Ka olocho ma onega, wabiro bedo wasumbini magu. Kata kamano, ka aloye ma anege, ubiro bedo wasumbini magwa. Temuru uyier ng’ato mondo ogore koda une.’

Daudi penjo jolweny moko ni: ‘Ng’at ma onego Ja-Filistiani ma ogolo ni Jo-Israel wich kuot, biro yudo ang’o?’

Jalweny moro dwoke ni: ‘Saulo biro miye mwandu mang’eny, kendo obiro miye nyare mondo obed chiege.’

Kata kamano, Jo-Israel duto oluoro Goliath, nikech ogangore ahinya. Borne kalo fut 9 (chiegni mita 3), to kendo iting’one kuot gi jalweny machielo.

Jolweny moko dhi kendo nyiso Ruoth Saulo ni Daudi dwaro kedo gi Goliath. Kata kamano, Saulo wacho ni Daudi niya: ‘Ok inyal kedo gi Ja-Filistia-ni. In mana wuowi matin, to en osebedo jalweny e ngimane duto.’ Daudi dwoko ni: ‘Ne anego dubu koda sibuor ma ne ting’o rombe wuonwa. Kendo mano ema biro timore ni Ja-Filistiani. Jehova biro konya.’ Kuom mano, Saulo wacho ni: ‘Dhiyo, kendo Jehova mondo obed kodi.’

Daudi ridore e aora to okawo kite abich mapoth, kendo oketogi e kirop jakwath. Bang’ mano, okawo orujre kendo owuok mondo odhi orom gi jal mogangoreno. Goliath kanene, to jare. Oparo ni nego Daudi biro bedo tich mayot ahinya.

Goliath wacho ni: ‘Bi abiya machiegni koda, kendo abiro miyo winy koda le mondo ocham ringre mari.’ Kata kamano Daudi wachone ni: ‘In ibiro kuoma gi ligangla gi tong’ koda dindo, to an abiro kuomi mana gi nying Jehova. Tinendeni, Jehova biro chiwi e lweta mi ananegi.’

Bang’ mano, Daudi ringo ka chomo kama Goliath nitie. Ogolo kidi e kirope, okete e orujrene, kendo owite gi tekone duto. Kidi fuyo ma dhi nyaka e pat wi Goliath, kendo Goliath podho piny to tho! Jo-Filistia kaneno ng’atgi mathuon ka opodho motho, gilokore kendo giringo. Jo-Israel ringo kalawogi, kendo gilocho e lwenyno.