BANG’ Daudi nego Goliath, Abner ma jatend lweny mar Jo-Israel kele e nyim Saulo. Saulo mor ahinya gi Daudi. Okete obedo jatend jolweny mage, kendo okawe mondo odag e od ruoth.

Bang’ ndalo moko, ka jolweny oa kedo gi Jo-Filistia, mon wer kawacho ni: ‘Saulo osenego gana mage, kata kamano Daudi to osenego ji gana gi gana.’ Mano miyo Saulo bedo gi nyiego nikech Daudi yudo pak mang’eny maloye. Kata kamano, Jonathan wuod Saulo to onge gi nyiego. Ohero Daudi ahinya, kendo Daudi bende ohere. Kuom mano, gitimo singruok ni kinde duto gibiro bedo osiepe.

Daudi en jathum maber ahinya, kendo Saulo ohero thumbe mogoyo. Kata kamano, chieng’ moro nyiego ma Saulo ni godo, miyo otimo gima rach ahinya. Seche ma Daudi goyo thum, Saulo kawo tong’ to bayego kowacho niya: ‘Abiro gure e kor ot!’ Kata kamano, Daudi pusore ma tong’ ok chop ire. Bang’e, Saulo temo chwowo Daudi gi tong’ kendo, to mano tame. Kuom mano, Daudi koro ong’eyo ni onego obed motang’.

Be inyalo paro singruok ma Saulo ne otimo? Ne owacho ni obiro chiwo nyare mondo okendi gi jalo ma ne nyalo nego Goliath. Saulo koro nyiso Daudi ni onyalo kawo nyare ma Mikal, to mana ka okwongo onego Jo-Filistia mia achiel. Par ane wachno! Saulo nigi geno ni Jo-Filistia biro nego Daudi. Kata kamano, timo mano otamogi, omiyo koro Saulo chiwo nyare mondo obed chi Daudi.

Chieng’ moro achiel, Saulo nyiso Jonathan koda jotije duto ni odwaro nego Daudi. Kata kamano, Jonathan wacho ni wuon mare ni: ‘Kik ihiny Daudi. Onge gima rach ma osetimoni. Gik moko duto ma osetimo osebedo mana ma konyi ahinya. Ne ochiwo ngimane kane onego Goliath, kendo kane ineno mano ne imor ahinya.’

Saulo winjo wuode, kendo osingo ni ok obi hinyo Daudi. Daudi iduoko, kendo otiyo ni Saulo e ode mana kaka ne otimo chon. Chieng’ moro achiel, ka Daudi goyo thum, Saulo kendo bayo Daudi gi tonge. Daudi kendo pusore, to tong’ goyo kor ot. Mani koro en mar adek! Daudi koro ong’eyo ni nyaka oringi!

Gotienono, Daudi dhi e ode. Kata kamano, Saulo oro jomoko mondo onege. Mikal ong’eyo gima wuon mare chano timo. Kuom mano, onyiso chwore ni: ‘Ka ok iringo kawuono gotienoni, kiny noyud kisetho.’ Gotienono, Mikal konyo Daudi e wuok kotiyo gi dirisa. Kuom higini madirom abiriyo, Daudi nyaka pondi kuonde mopogore opogore mondo Saulo kik yude.