BE ING’EYO ni magi gin jo mage, kendo gitimo ang’o? Gidhi e lweny, to jo manie nyimgi kanyogo wer. Kata kamano, inyalo penjo ni: ‘Ang’o momiyo joma wergo onge gi ligangla kod tonge mag kedo?’ We mondo wane.

Jehoshafat en ruoth mar pinyruodh dhoudi-ariyo e Israel. Odak e kinde ma Jezebel kod Ahab Ruodh pinyruodh dhoudi-apar man yo masawa, ne odakie. Kata kamano, Jehoshafat en ruoth maber, kendo wuon mare ma Asa bende ne en ruoth maber. Kuom mano, kuom higini mang’eny, joma ni e bwo pinyruodh dhoudi-ariyo man yo milambo, bedo gi ngima maber.

Kata kamano, gimoro koro timore ma miyo ji luoro. Joote kelo ni Jehoshafat wach ni: ‘Jolweny mang’eny moa e pinje mag Moab, Amon, kod Got Seir biro mondo gimonji.’ Jo-Israel mang’eny chokore e dala mar Jerusalem mondo gikwa Jehova kony. Gidhi e hekalu, kendo Jehoshafat lemo kuro niya: ‘A Jehova Nyasachwa, ok wang’eyo gima onego watim. Waonge nyalo e nyim jolweny mang’enygi. In ema wabiro iri mondo imiwa kony.’

Jehova winjo, kendo ooro achiel kuom jotichne mondo onyis ji ni: ‘Lweny ok en maru, to en mar Nyasaye. Ok bi chuno ni nyaka ukedi. Chung’uru achung’a, mondo une kaka Jehova noresu.’

Kuom mano, kinyne gokinyi, Jehoshafat nyiso ji ni: ‘Beduru gi geno kuom Jehova!’ Bang’e oketo jower e nyim jolweny, kendo giwer ka gipako Jehova seche ma giwuotho. Be ing’eyo gima timore ka gichopo machiegni gi kar lweny? Jehova miyo wasikegi kedo e kindgi giwegi. Kendo ka Jo-Israel chopo, ginwang’o ni jolweny ma jowasikgi duto otho!

Donge Jehoshafat ne otiyo gi rieko kane oketo geno kuom Jehova? Wan bende wabiro nyiso ni wan jo mariek ka waketo geno marwa kuom Jehova.