HIGINI apar osekalo nyaka ne Ruoth Nebukadnezzar ter Jo-Israel mosomo ahinya, e piny Babulon. To koro ne gima timore! Jerusalem iwang’o. Jo-Israel ma ok onegi itero kaka wasumbini nyaka Babulon.

Par bende ni jonabi mag Jehova ne owuoyo kuom gima ne dhi timore, ka ji ok ne dhi loko timbegi maricho. Kata kamano, Jo-Israel to ne ok owinjo jonabi. Ne gidhi nyime gilamo nyiseche manono kar lamo Jehova. Kuom mano, nyaka ne migi kum. Wang’eyo mani nikech Ezekiel janabi mar Nyasaye nyisowa gik maricho ma Jo-Israel ne timo.

Be ing’eyo ng’ama Ezekiel en? En achiel kuom rawere ma Ruoth Nebukadnezzar ne otero Babulon higini apar mosekalo, ka kethruok maduong’ni mar Jerusalem ne podi ok otimore. Daniel kod osiepene adek, Shadrak, Meshak gi Abednego bende ne oter Babulon e kindeno.

Ka Ezekiel podi ni Babulon, Jehova nyise gik maricho matimore ei hekalu man Jerusalem. Jehova timo mani e yor hono. Ezekiel podi ni Babulon, kata kamano, Jehova miyo oneno gimoro amora matimore e hekalu. To gima Ezekiel neno en gima lich!

Jehova wachoni Ezekiel ni: ‘Ne ane gik maricho ma chido chuny ma ji timo e hekalu kae. Ne kaka sisi mar hekalu opong’ gi piche mag thuonde kod le mamoko. Kendo ne, Jo-Israel lamo gigi!’ Ezekiel nyalo neno gigi, kendo ondiko piny gik matimore.

Jehova penjo Ezekiel ni ‘Be ineno gima jotend Israel timo e yo maling’ling’?’ Ee, onyalo neno mani en bende. Gin chwo 70, kendo giduto gilamo nyiseche manono. Giwacho ni: ‘Jehova ok newa. Osejwang’o piny.’

Bang’e Jehova nyiso Ezekiel mon moko e rangach ma yo masawa mar hekalu. Gibet kanyo ka gilamo nyasaye manono miluongo ni Tammuz. To ne ane chwo mantie e dho ranga hekalu mar Jehova! Gin ji madirom piero ariyo gabich. Ezekiel nenogi. Gikulore ka girango yo wuok chieng’, kendo gilamo chieng’!

Jehova wacho ni: ‘Jogi ok miya luor. Ok gitim mana gik maricho kende, to gitimogi nyaka ei hekalu mara!’ Kuom mano, Jehova singo ni: ‘Giniwinj teko mar mirimba. Kendo ok nanenigi ng’wono e kinde mikethogi.’

Jo-Israel ng’anjo ne Ruoth Nebukadnezzar ka higini adek kende ema osekalo bang’ Jehova nyiso Ezekiel wechegi. Kuom mano, Nebukadnezzar dhi mondo oked kodgi. Bang’ higa achiel gi nus, Jo-Babulon muomo ohinga Jerusalem, kendo giwang’o dalano pep. Ng’eny ji inego kata itero Babulon kaka wasumbini.

Ang’o momiyo Jehova oweyo mondo oketh dala Jo-Israel e yo marach kama? Ee, nikech ok giwinj wach Jehova, kendo ok gisebedo ka giluwo chikene. Mani nyiso kaka en gima duong’ ni mondo kinde duto watim gima Nyasaye wacho.

E kinde mokwongo, ji matin iweyo mondo odagi e piny Israel. Ruoth Nebukadnezzar keto Ja-Yahudi ma nyinge Gedalia mondo ochung’ne jogi. Kata kamano, Jo-Israel moko nego Gedalia. Koro ji nigi luoro ni Jo-Babulon nyalo biro mondo otiekgi giduto nikech gima rach mosetimoreni. Kuom mano, gichuno Yeremia ni mondo odhi kodgi, kendo giringo nyaka Misri.

Mani miyo piny Israel dong’ ma onge ji kata matin. Kuom higini 70 onge ng’ama odak e pinyno. Odong’ nono maonge gimoro amora. Kata kamano, Jehova singo ni obiro duoko joge e pinyno bang’ higini piero abiriyo. To ka mano podi, ang’o matimore ni oganda Nyasaye e piny Babulon kama osetergieno? We wane.