BANG’ tho Ruoth Jeroboam, ruodhi duto ma locho e wi pinyruodh dhoudi-apar man yo masawa, bedo gin ruodhi maricho. Ruoth Ahab e ruoth marach moloyogi duto. Be ing’eyo gimomiyo? En nikech dhako marach ma en go, Jezebel.

Jezebel ok en Nya-Israel. En nyar ruodh Sidon. Olamo nyasaye manono ma nyinge Baal, kendo omiyo Ahab kod Jo-Israel mang’eny bende lamo Baal. Jezebel ok ohero Jehova, kendo onego ng’eny jonabi mag Jehova. Moko kuomgi chuno ni nyaka pondi e rogo mondo kik neggi. Jezebel ka dwaro gimoro, onyalo kata nego ng’ato mondo oyud gino.

Chieng’ moro, Ruoth Ahab okuyo ahinya. Kuom mano, Jezebel koro penje ni: ‘Ang’o momiyo ikuyo kawuono?’

Ahab dwoke ni: ‘En nikech gima Naboth ne owachona. Ne adwaro ng’iewo puothe mar mzabibu. To ne onyisa ni ok anyal kawogo.’

Jezebel wachone ni: ‘Kik idew. Abiro yudoni puodhono.’

Kuom mano, Jezebel ndiko barupe ni jodongo moko e dala maduong’ kama Naboth odakie. Ondiko ni: ‘Yuduru jo moko ariyo ma orochore mondo giwach ni, Naboth osekuong’o Nyasaye koda ruoth. Bang’e, uter Naboth oko mar dala mondo uchiele gi kite nyaka otho.’

Jezebel ka winjo ni Naboth otho, onyiso Ahab ni: ‘Koro dhi mondo ikaw puothe.’ Donge iyie ni onego okum Jezebel nikech gima rach motimono?

Kuom mano, bang’ kinde moko, Jehova oro ng’at miluongo ni Jehu mondo okum Jezebel. Jezebel ka winjo ni Jehu biro, owiro wang’e, kendo otemo bidhore mondo onere dhako majaber. Kata kamano, Jehu kachopo kendo neno Jezebel e dirisa, onyiso joma ne nie od ruoth ni: ‘Boleuru piny!’ Jogo timo kaka owacho, mana kaka inyalo neno e pichano. Gibole piny, kendo otho. Ma e giko mar Jezebel dhako marach ma ne chi ruoth.