BE ING’EYO gimomiyo ng’atni kwayo Jehova e lamo? En ang’o momiyo oketo barupe minenogo e nyim altar mar Jehova? Ng’atni en Hezekia. En e ruoth motelo ni dhoudi ariyo ma milambo mag Israel. To en gi chandruok mang’eny ahinya. Nikech ang’o?

En nikech jolweny mag Asuria oseketho dhoudi apar ma masawa. Jehova ne oweyo mani otimore nikech jogo ne richo ahinya. Koro jolweny mag Asuria osebiro mondo oked kod pinyruodh dhoudi-ariyogi.

Ruodh Asuria oseoro barupe ni Ruoth Hezekia. Magi e barupe ma Hezekia oketo e nyim Nyasaye kani. Gin barupe ma jaro Jehova, kendo nyiso Hezekia ni mondo kik okedi. Kuom mano, mani ema miyo Hezekia lemo kama: ‘A Jehova, reswa e lwet ruodh Asuria. Eka ogendini duto biro ng’eyo ni in kendi e Nyasaye.’ Be Jehova biro winjo lamo mar Hezekia?

Hezekia en ruoth maber. Ok en kaka ruodhi maricho mag pinyruodh dhoudi-apar mag Israel, kata mana kaka wuon mare Ahaz ma ne en Ruoth marach. Hezekia osebedo ka temo ahinya mondo oluw chike duto mag Jehova. Kuom mano, Hezekia ka tieko lemo, janabi Isaiah orone ote moa kuom Jehova mawacho ni: ‘Ruodh Asuria ok bi donjo Jerusalem. Onge kata achiel kuom jolweny mage mabiro sudo machiegini gi Jerusalem. Ok gibi chielo kata mana athero achiel kochomo Jerusalem.’

Ng’i ane picha mantie kae. Be ing’eyo ni jolweny motho-gi duto gin jo mage? Gin Jo-Asuria. Jehova ne ooro malaika mare, monego jolweny mag Asuria 185,000 e otieno achiel kende. Kuom mano, ruodh Asuria chunye ool kendo odok dala.

Mano e kaka pinyruodh dhoudi-ariyo ireso, kendo ji bedo gi kuwe kuom kinde matin. Kata kamano, bang’ tho Hezekia, wuode ma Manase ema bedo ruoth. Manase kod wuode ma Amon ma ne oluwo bang’e, gin ruodhi maricho. Nikech mano, piny kendo opong’ gi mahundu kod timbe mag gero. Ka Ruoth Amon onegi gi jotije owuon, wuode ma Josia iketo ruoth e wi pinyruodh dhoudi-ariyo.