MANI en picha mar paradis, machalo gi paradis ma ne Nyasaye onyiso janabi mare Isaiah. Isaiah ne odak bang’ tho Jona.

Paradis en “puodho” kata kama olos maber mopidhie mauwa gi yien. Be mani paroni gimoro ma waseneno ei bugni? Onenore mana kaka puodho majaber ma ne Jehova Nyasaye oloso ni Adam gi Hawa, donge? Be piny mangima nobed paradis chieng’ moro?

Jehova ne onyiso janabi mare Isaiah ni mondo ondik weche manyiso paradis mabiro ne oganda Nyasaye. Ne owacho niya: ‘Ondieg sidhe nodag gi kuwe kaachiel gi rombe. Nyiroye kod nyithind sibuor nochiem kaachiel, kendo noritgi gi nyithindo matindo. Kata mana nyathi ok nohinyre, kata obedo ni otugo machiegni gi thuond rai.’

Ji mang’eny biro wacho ni: ‘Mani ok nyal timore. Piny osebedo gi chandruok kuom kinde duto, kendo chandruok biro siko.’ Kata kamano, par ane wachni: En kar dak machalo nade ma ne Nyasaye omiyo Adam gi Hawa?

Nyasaye ne oketo Adam gi Hawa e paradis. En mana nikech ok ne giwinjo chik Nyasaye, e momiyo ne gilalo kar dak margi maber, ma giti kendo githo. Nyasaye singo ni obiro miyo jogo mohere, mana gigo ma Adam gi Hawa ne olalo.

E paradis mabiro, onge gima nohiny kata ketho gimoro. Kuwe mar adier nobedie. Ji duto nobed gi ngima ma onge tuoche, kendo ka gimor. Piny nobed mana kaka ne Nyasaye dwaro ni mondo obedi e kinde mokwongo. Kata kamano, wabiro puonjore bang’e kaka Nyasaye biro timo mani.