BE INYALO neno gima otimore? Wuowino oreso nyarombo matinno koa kuom ondieg dubu. Dubuno ne obiro moting’o nyarombono, kendo ne odhi chame. Kata kamano, wuowino ne olawogi, ma oreso nyarombono e dho dubu. Ka dubu ne temo kedo kode, wuowino ne omake ma ogoye piny motho! Chieng’ moro bende ne oreso achiel kuom rombene kuom sibuor. Donge en wuowi ma jachir? Bende ing’eyo ni en ng’a?

Rawerani en Daudi. Odak e dala mar Bethlehem. Kwar mare ne en Obed ma wuod Ruth gi Boaz. Be inyalo parogi? To wuon Daudi en Jesse. Daudi kwayo rombe mag wuon mare. Ne onyuol Daudi higini 10 bang’ Jehova yiero Saulo mondo obed ruoth.

Kinde koro chopo ma Jehova wachoni Samuel ni: ‘Kaw mo makende mondo idhi e od Jesse Bethlehem. Aseyiero achiel kuom yawuote mondo obed ruoth.’ Samuel kaneno Eliab wuod Jesse makayo, oparo ka owacho ni: ‘Ma ema Jehova oyiero adier.’ Kata kamano, Jehova wachone ni: ‘Kik irang borne kata chia ma en go. Ok ayiere mondo obed ruoth.’

Kuom mano, Jesse luongo Abinadab wuode, to okele e nyim Samuel. Kata kamano, Samuel wacho ni: ‘Ooyo, en bende Jehova ok oyiere.’ Bang’ mano, Jesse kelo wuode ma Shamma. Samuel wacho ni: ‘Ooyo, en bende Jehova ok oyiere.’ Jesse kelo yawuote abiriyo e nyim Samuel, kata kamano, Jehova ok yier kata achiel kuomgi. Samuel penjo ni: ‘Magi kende e yawuowi ma in go?’

Jesse wacho ni: ‘Nitie moro machogo. Kata kamano en e kwath ong’iyo rombe.’ Seche ma okel Daudi, Samuel neno ni en wuowi ma jachia. Jehova wacho ni: ‘Mani e en. Ol mo e wiye.’ To mano e gima Samuel timo. Kinde biro ma Daudi nobed ruodh Israel.