BE ING’EYO gimomiyo ng’ani yiecho lawe matindo tindo? Jehova ne onyise ni mondo otim kamano. En Ahija, janabi mar Nyasaye. Be ing’eyo ni janabi en ng’at ma timo ang’o? En ng’at ma Nyasaye nyiso gik mabiro timore, ka podi ok gitimore.

Ahija wuoyo gi Jeroboam kae. Jeroboam en ng’at ma Solomon ne oketo mondo ochung’ ne tijene moko mag gedo. Ahija ka romo gi Jeroboam e wang’yo kae, otimo gimiwuoro. Olonyo kandhu manyien morwako, kendo oyieche obedo 12 matindo tindo. Onyiso Jeroboam niya: ‘Kaw apar kuomgi gibed magi.’ Be ing’eyo ni Ahija miyo Jeroboam lewni moyiech matindo apargo nikech ang’o?

Ahija wacho ni, Jehova dhi mayo Solomon pinyruoth. Owacho ni, Jehova biro miyo Jeroboam dhoudi apar. Mani nyiso ni dhoudi ariyo kende ema ibiro weyo ni Rehoboam wuod Solomon mondo obed gi loch e wigi.

Solomon ka winjo gima Ahija onyiso Jeroboam, iye wang’ ahinya. Otemo nego Jeroboam. Kata kamano, Jeroboam ringo nyaka Misri. Bang’ kinde matin, Solomon tho. Ne obedo ruoth kuom higini 40, to koro iketo wuode ma Rehoboam mondo obed ruoth. Mwalo e piny Misri, Jeroboam winjo ni Solomon otho, omiyo koro oduogo Israel.

Rehoboam ok en ruoth maber. Okwiny gi ji moloyo kata Solomon wuon mare. Jeroboam gi jodongo mamoko dhi ir Ruoth Rehoboam, kendo gikwaye mondo odag maber gi ji. Kata kamano, Rehoboam ok winj wach. Kuom adier, obedo makwiny moloyo kaka chon. Kuom mano, ji keto Jeroboam obed ruodh dhoudi 10, to dhoudi ariyo mag Benjamin gi Juda dong’ gi Rehoboam kaka ruodhgi.

Jeroboam ok dwar ni mondo ji odhi Jerusalem lamo e hekalu mar Jehova. Kuom mano, okawo nyiroye ariyo molos gi dhahabu, kendo omiyo pinyruodh dhoudi-apar lamo nyiroyego. Bang’ kinde matin, piny opong’ gi timbe mag mahundu koda gero.

Nitie chandruok e pinyruodh dhoudi-ariyo bende. Rehoboam bedo ruoth, to ka podi ok otieko higini abich, ruodh Misri biro mondo oked gi Jerusalem. Opeyo mwandu mang’eny ei hekalu mar Jehova. Kuom mano, hekaluno bedo kaka ne ogere, mana kuom kinde matin kende.