NE SAMUEL ka olo mo e wi ng’atno. Kamano e kaka ne itimo ni ng’ato mondo onyis ni oseyiere obed ruoth. Jehova nyiso Samuel mondo ool mo e wi Saulo. En mo makende, kendo mang’we ng’ar.

Saulo ne ok par ni ne ober ahinya ma ne nyalo bedo ruoth. Owacho ne Samuel ni: ‘An awuok e dhood Benjamin, matinie mogik e i Israel. Ang’o momiyo iwacho ni abiro bedo ruoth?’ Jehova ohero Saulo nikech ok ong’awore malo. Mano ema miyo Nyasaye yiere obed ruoth.

Kata kamano, Saulo ok en ng’at matin kata ma jachan. Owuok e ot man kod mwandu, kendo en dichwo ma rabora, ma jachia. Chiegni ni oyombo Jo-Israel duto gi bor mar fut achiel! Saulo bende en jang’wech maber ahinya, kendo en ng’ama ratego. Ji mor ahinya nikech Jehova oyiero Saulo kaka ruoth. Giduto gichako kok ka giwacho ni: ‘Ruoth odag aming’a!’

Wasigu mag Israel podi gin roteke miwuoro. Podi gimiyo Jo-Israel chandruok mang’eny mana kaka chon. Bang’ ka Saulo oseketi ruoth, piyo nono Jo-Amon biro mondo oked kodgi. Kata kamano, Saulo choko jolweny mang’eny, kendo oloyo Jo-Amon e lweny. Mano miyo ji bedo mamor nikech Saulo en ruoth.

Kaka higini medo sudo, Saulo bende telo ni Jo-Israel e loyo lwenje e kindgi gi wasigu. Saulo bende ni kod wuowi ma jachir miluongo ni Jonathan. Kendo Jonathan konyo Israel e loyo lwenje mang’eny. Jo-Filistia podi gin wasigu mag Jo-Israel ahinya. Chieng’ moro achiel, Jo-Filistia gana gi gana biro mondo gikedi kod Jo-Israel.

Samuel nyiso Saulo ni mondo orite nyaka obi ogol misango kata chiwo ne Jehova. Kata kamano, Samuel deko. Saulo oluor ni Jo-Filistia biro chako lweny, omiyo odhi nyime gi timo misangono en owuon. Gikone ka Samuel chopo, onyiso Saulo ni ne ok oluwo chik. Samuel wachone ni: ‘Jehova biro yiero ng’ama chielo mondo obed ruoth e wi Israel.’

Bang’e, Saulo kendo ketho chik. Kuom mano, Samuel koro nyise ni: ‘Ber luwo chik Jehova moloyo golone chiwo mag rombe mabeyo. To nikech ok iluwo chik Jehova, Jehova ok bi weyi ibed ruodh Israel.’

Wanyalo yudo puonj maber kuom wachni. Onyisowa kaka en gima ber luwo chike Jehova kinde duto. Bende onyiso ni ng’at maber, kaka Saulo ne okwongo bedo, nyalo lokore mabed ng’at marach. Ok wadwar bedo jo maricho, donge?