DAUDI kane pok otho, ne omiyo Solomon chenro ma Nyasaye ne ochiwo mar gero hekalu mar Jehova. E higa mar ang’wen kane en e loch, Solomon chako gero hekalu, kendo okawo higini abiriyo gi nus mondo otieke. Gana mag ji tiyo e gero hekaluno, kendo gero odno kawo pesa mang’eny ahinya. Ma en nikech itiyo gi dhahabu kod fedha mang’eny ahinya e gere.

Opog i hekalu nyadiriyo, mana kaka ne otim gi tabanakel. Kata kamano, udi ariyogi dongo maloyo mag tabanakel nyadiriyo. Solomon miyo iketo sandug singruok e od hekalu ma iye, to gik mamoko ma ne iketo e tabanakel, iketo e ot machielono.

Ka gero hekalu rumo, itimo nyasi maduong’. Solomon goyo chonge piny e nyim hekalu kendo olamo Jehova mana kaka inyalo neno e pichano. ‘Kata mana polo mangima ok duong’ moromo ting’i, to koro hekaluni diromi nadi! Kata kamano, Nyasacha, yie iwinj oganda mari ka lemo ka gichomo odni.’

Seche ma Solomon tieko lamo mare, mach lor piny koa e polo. Kendo mach wang’o misengini mag le ma oselosi. Kendo ler marieny ahinya mowuok kuom Jehova pong’o hekalu. Mani nyiso ni Jehova winjo, kendo omor gi hekaluno kod kwayo ma Solomon ne otimo. Hekaluno ema koro bedo kama ji biro lemoe, to ok tabanakel.

Solomon locho e yo mariek kuom higini mang’eny, kendo ji mor. Kata kamano, Solomon nyuomo mon mang’eny moa e pinje mamoko ma ok lam Jehova. Be inyalo neno achiel kuomgi ka lemo e nyim sanamu-no? Gikone, mon-gi miyo Solomon lamo nyiseche mamoko bende. Be ing’eyo gima timore ka Solomon timo mano? Ok oti gi ji e yo mang’won kendo. Obedo mager, kendo ji ok mor kaka chon.

Mani miyo Jehova iye wang’ gi Solomon, kendo onyise ni: ‘Abiro kawo pinyruoth kuomi, kendo anamiye ng’at machielo. Ok natim kamano kinde ma podi ingima, to e kinde mag loch mar wuodi. Kata kamano, ok abi kawo jo pinyruodhno duto a kuom wuodi.’ We mondo wane kaka mano timore.