RUOTH Nebukadnezzar kawo Jo-Israel duto mosomo ahinya, kendo oterogi nyaka Babulon. Bang’e, ruoth yiero kuomgi rawere mariek, kendo ma jochia ahinya. Ang’wen kuomgi e yawuowi mineno kae. Achiel en Daniel, to adek modong’ Jo-Babulon luongo ni Shadrak, Meshak kod Abednego.

Nebukadnezzar dwaro miyo raweregi tiegruok mondo omi giti e od ruoth. Bang’ higini adek mag tiegruok, obiro yiero mana mariek ahinya kuomgi mondo gikonye ng’ado rieko kuom weche matek. Ruoth dwaro ni mondo yawuowigi obed motegno, kendo ma dendgi ber e kinde ma imiyogi tiegruok. Kuom mano, ochiko jotije ni mondo omi yawuowigi duto chiemo ma miyo, kod divai ma en kaachiel gi joode ne chamo.

Ng’i ane rawera ma Daniel. Be ing’eyo gima owacho ni jatend jotij Nebukadnezzar miluongo ni Ashpenaz? Daniel nyise ni ok odwar chamo chiemo ma miyo e mesa mar ruoth. Ashpenaz to luoro omako. Owachone ni, ‘Ruoth oseng’ado gima onego ucham, kendo umadh. Omiyo ka ok ubedo gi del maber kaka rawere mamokogo, onyalo nega.’

Koro Daniel dhi ir jarit ma Ashpenaz oseketo e wiye koda osiepene adek. Owachone ni, ‘Kiyie, ketwa e tem kuom ndalo apar. Miwa alode wacham kod pi mondo wamodh. Bang’e, ipimwa kod rawere mamoko machamo chiemb ruoth, mondo ine ni jo mage e kindwa kodgi ma ngimagi ber.’

Jarit-gi yie timo kamano. Kendo ka ndalo apar rumo, ngima Daniel kod osiepene adek ber maloyo rawere mamoko duto. Kuom mano, jarit weyogi mondo gidhi nyime gi chamo alode kar chamo chiemo ma ruoth miyogi.

Bang’ higini adek, itero raweregi duto ir Nebukadnezzar. Ka osewuoyo kodgi giduto, ruoth nwang’o ni Daniel gi osiepene adek ema riek moloyo. Kuom mano, okawogi mondo gikonye tich e od ruoth. Kendo kinde duto ma ruoth penjo weche matek, Daniel, Shadrak, Meshak kod Abednego nikod ng’eyo molony maloyo jodolo kata jorieko mag ruoth nyadipar.