Polo gi piny ne oa kanye? Ere kaka chieng’, dwe, sulwe koda gik ma ochwe e piny ne ochakore? Muma miyowa dwoko madier ka owacho ni ne ochwegi gi Nyasaye. Omiyo bugwani chako kod sigendini mag Muma mawuoyo kuom chwech.

Wapuonjore ni chwech mokwongo mag Nyasaye ne gin chwech mag roho machalo kode. Ne gin malaike. Piny to ne ochwe ne ji kaka wan. Omiyo Nyasaye ne ochweyo dichwo gi dhako miluongo ni Adam kod Hawa ma oketogi e puodho majaber. Kata kamano, ne ok giluwo chik Nyasaye, kendo mani ne okethonegi thuolo ma ne gin-go mar dhi nyime gi ngima.

Ka wariwo higini duto chakre chwe Adam nyaka chopi kinde mag Ataro mar pi, gin higini 1,656. E kindego duto, ji mang’eny maricho ne odak e piny. E polo, ne nitie chwech mag roho ma ok ne, Satan kod malaikene maricho. E piny, ne nitie Kain koda jomoko maricho, kaachiel gi ji mathuondi mogangore miwuoro. Kata kamano, ne nitie joma beyo bende e piny kaka Abel, Enok koda Noa. E Kare MOKWONGO, wabiro somo weche mag jogi duto koda gigo ma ne timore.