NOA ne nigi dhako kod yawuowi adek. Nyinge yawuotego ne gin Shem, Ham gi Jafeth. Kendo yawuowigi ne nigi mondegi. Kuom mano, jood Noa ne gin ji aboro.

Nyasaye koro ne onyiso Noa ni mondo otim gima wendo. Ne onyise ni mondo oger yie maduong’. Yieno ne ng’ongo kaka meli, kata kamano ne ochalo ahinya gi sanduk maduong’, mabor. Nyasaye ne owachone niya: ‘Lose mondo obed gi gorofe adek, kendo iket udi matindo e iye.’ Ute matindogo ne gin mag Noa, joode kod le ma ne orwak ei yie, kendo kod kano chiemo ma ne gidhi chamo.

Nyasaye bende ne onyiso Noa ni mondo omuon i yie gi odok mondo pi kik chwer ka donjo iye. Nyasaye ne owacho niya: ‘Akelo ataro mar pi mondo oketh piny mangima. Gik moko duto ma ok nobed ei yieno, biro tho.’

Noa gi yawuote ne owinjo wach Jehova, kendo ne gichako gedo. Kata kamano, jomoko ne nyierogi anyiera. Ne gimedo bedo jo maricho. Onge ng’at ma ne oyie gi wach Noa kane onyisogi gima Nyasaye ne dhi timo.

Tij gero yie ne okawo kinde mang’eny nikech ne en yie mang’ongo. Gikone, ne otieke bang’ higini mang’eny. Nyasaye koro ne onyiso Noa ni mondo orwak le ei yie. Nyasaye ne owachone ni mondo okel le ariyo ariyo, madichwo gi madhako. To nitie kit le moko, ma Nyasaye ne onyise ni mondo okel abiriyo abiriyo. Nyasaye bende ne onyiso Noa ni mondo okel kit winyo duto. Noa ne otimo mana kaka Nyasaye ne ochike.

Gikone, Noa gi joode ne odonjo ei yie. Bang’ mano, Nyasaye ne oloro dho yie. Noa gi joode ne rito ka gin ei yie. Tem ane paro ni in bende in kodgi ka urito. Be ataro ne dhi biro kaka Nyasaye ne osewacho?