NG’I ane kaka piny chalo kae! Ne kaka gik moko duto lombo wang’! Ng’i ane lum koda yien, mauwa koda le duto. Bende inyalo neno liech koda sibuor?

Puodho majaberni ne ochakore nade? We mondo wane ane kaka Nyasaye ne olosonwa piny.

Mokwongo, Nyasaye ne ochweyo lum mondo otwi e wi piny. Kendo ne ochweyo yien matindo koda madongo mopogore opogore. Gikonyo e loso piny obed kama ber. Kata kamano, gitimo mang’eny maloyo mano. Ng’enygi bende miyowa chiemo mamit ahinya.

Bang’e Nyasaye ne ochweyo rech mondo odag e pi kod winy mafuyo e kor polo. Ne ochweyo guogi, paka koda farese, le madongo koda matindo. Gin le mage modak machiegni kodi? Donge onego wamor nikech Nyasaye ne ochweyonwa gigi duto?

Gikone, Nyasaye ne oloso puodho makende e piny. Ne oluonge ni puodho mar Eden. Ne en puodho makare chuth. Gimoro amora ma ne ni e iye ne ber. To Nyasaye ne dwaro mondo piny duto obed kama ber kaka puodho ma ne olosoni.

To ng’i ane picha manie puodhoni kendo. Bende ing’eyo gima Nyasaye ne neno ni podi onge? We mondo wane.