NG’I ane Kain gi Habil sani. Giduto gisebedo jo madongo. Kain en japur. Opidho cham gi olembe koda alode.

Habil osebedo japidh rombe. Ohero rito nyirombe matindo. Gi dongo kendo bang’e Habil bedo gi kweth maduong’ mar rombe ma nyaka orit.

Chieng’ moro Kain gi Habil kelo chiwo ni Nyasaye. Kain okelo chiemo ma ne opidho. To Habil ne okelo rombo maber ahinya ma ne en-go. Jehova mor gi chiwo mar Habil. To ok omor gi chiwo mar Kain. Be ing’eyo gimomiyo?

Ok en mana ni chiwo mar Habil ber moloyo mar Kain. En nikech Habil en ng’a maber. Ohero Jehova koda owadgi. To Kain en ng’a marach; ok ohero owadgi.

Kuom mano, Nyasaye nyiso Kain ni mondo olok timbene. Kata kamano, Kain ok winj wach. Mirima omake nikech Nyasaye ne ohero Habil maloye. Koro Kain nyiso Habil owadgi niya: ‘We mondo wadhi e puodho koni.’ Kane gin kendgi kuro, Kain ne ogoyo Habil owadgi. Ne ogoye matek ma onege. Donge gima Kain ne otimono ne en gimarach ahinya?

Kata obedo ni Habil ne otho, Nyasaye pod pare. Habil ne en ng’at maber, kendo wi Jehova ok wil gi ng’at machalo kamano. Kuom mano, chieng’ moro Jehova Nyasaye nochier Habil kendo. E kindeno, Habil ok nochak otho kendo ngang’. Obiro bedo gi thuolo mar dak e piny kae nyaka chieng’. Donge nobed gima ber ahinya ng’eyo ji machalo gi Habil?

Kata kamano, Nyasaye ok mor gi jogo machalo gi Kain. Kuom mano, Kain kane osenego owadgi, Nyasaye ne oriembe oa kuom joodgi mondo odhi odag mabor. Kane Kain odhi dak e gweng’ machielo man mabor, ne okawo achiel kuom nyiminene ma ne obedo chiege.

Bang’e, Kain gi chiege ne ginyuolo nyithindo. Yawuot Adam gi Hawa mamoko ne okendo, nyigi bende ne okendi, ma gin bende ne giyudo nyithindo. Ji ne obedo mang’eny e piny bang’ kinde matin. We mondo wapuonjore e wi jomoko kuomgi.