MANI en Yesu e Got Zeituni. Ji ang’wen man kodego, gin jootene. Gin Andrea kod Petro omin mare, kaachiel gi Jakobo koda Johana ma bende gin owete. Minyalo neno gi ku maborno, en hekalu mar Nyasaye man Jerusalem.

Ndalo ariyo osekalo nyaka ne Yesu donj Jerusalem koidho kanyina matin. En Tich Ariyo. Chieng’no gokinyi, noyudo ka Yesu ni e hekalu. Jodolo notemo mako Yesu kanyo mondo ginege. Kata kamano, ne giluor timo kamano nikech ji ohero Yesu.

‘Un thuonde kendo koth thuonde!’ Kamano e kaka Yesu noluongo jotend din-go. Bang’e, Yesu ne owacho nigi ni Nyasaye ne dhi miyogi kum nikech gik maricho duto ma gisetimo. Bang’ mano, Yesu nobiro e Got Zeituni, kendo jootene ang’wen-gi, nochako penje penjo moko. Be ing’eyo gik ma gipenjo Yesu?

Joote penjo gik ma biro timore kinde mabiro. Ging’eyo ni Yesu biro tieko richo duto manie piny. Kata kamano, gidwaro ng’eyo ni magi notimre karang’o. En karang’o ma Yesu biro duogo kendo mondo oloch kaka Ruoth?

Yesu ong’eyo ni jolupne manie piny ok bi nene koduogo kendo. Mani en nikech obiro bet e polo, kendo ok gibi nene ka en kuro. Kuom mano, Yesu nyiso jootene, moko kuom gigo ma nobed ka timore e piny e kinde molocho kaka Ruoth e polo. Moko kuom gigo gin mage?

Yesu wacho ni lwenje madongo nobedie, ji mang’eny nobed matuwo, kendo kech nokagi, mahundu biro betie e yo marach ahinya, kendo yiengini madongo mag piny nobedie. Yesu wacho bende ni wach maber mar pinyruodh Nyasaye ibiro landi kamoro amora e piny. Bende waseneno gigi ka timore e ndalowa? Ee! Kuom mano, wanyalo bedo gi geno ni Yesu koro locho e polo. Machiegini, obiro kelo giko mar richo duto e piny.