YAKO majachia ma ineno kani en Mariam. En Nya-Israel modak e dala mar Nazareth. Nyasaye ong’eyo ni en ng’at maber ahinya. Mano ema omiyo ooro Gabriel malaika mare, mondo owuo kode. Bende ing’eyo gima malaika Gabriel obiro wacho ni Mariam? We wane.

Gabriel wachone ni ‘Misawa, in ng’ama otimne ng’wono. Jehova ni kodi.’ Mariam podi ok oneno ng’atni nyaka nene. Chunye chandore, nikech ok ong’eyo gima ng’atni wacho. Kata kamano, Gabriel hoye mapiyo mondo kik obed giluoro mang’eny.

Malaika wachone ni: ‘Kik iluor. Jehova omor kodi ahinya. Mano e momiyo obiro timoni gima ber miwuoro. Ibiro yudo nyathi machiegni, kendo iniluong nyinge ni Yesu.’

Gabriel dhi nyime kalerone ni: ‘Nyathini nobed gi duong’, kendo noluonge ni Wuod Ng’a Mamalo Chutho. Kendo Jehova nomiye bedo ruoth kaka Daudi. Kata kamano, Yesu nobed ruoth nyaka chieng’, kendo loch mare ok norum!’

Mariam penjo ni: ‘Mago duto nyalore nade? Podi ok okenda. Podi ok adak gi dichwo, anyalo yudo nyathi nade?’

Gabriel dwoke ni: ‘Teko Nyasaye nobi iri, omiyo nyathi mibiro nyuolo noluong ni Wuod Nyasaye.’ Bang’e onyiso Mariam ni: ‘Par watni Elisabeth. Ji ne wacho ni oti ahinya ma ok onyal yudo nyithindo. Kata kamano, koro ochiegni yudo nyathi mawuowi. Omiyo ineno, onge gima Nyasaye ok nyal timo.’

Gie sano, Mariam wacho ni: ‘An jatich Jehova! We mondo otimorena mana kaka iwacho.’ Eka malaika weye.

Mariam wuok, reto kadhi limo Elisabeth. Ka Elisabeth winjo dwond Mariam, nyathi manie iye tugo ka mor. Teko mar Nyasaye pong’o Elisabeth kendo owacho ni Mariam ni: ‘In ng’ama ogwedhi e kind mon.’ Mariam dak kod Elisabeth kuom dweche adek, kendo bang’e odok dala Nazareth.

Dichwo miluongo ni Josef chiegni kendo Mariam. Kata kamano, ka Josef fwenyo ni Mariam chiegni nyuolo nyathi, oneno ni ok onego okende. Eka malaika mar Nyasaye wachone ni: ‘Kik iluor kawo Mariam mondo obed chiegi. Nimar, Nyasaye ema omiye nyathi mawuowi.’ Kuom mano, Mariam kod Josef kendore, kendo girito mondo onyuol Yesu.