NE YESU kobet kae. Opuonjo jogi duto e got moro e dala mar Galili. Joma obet machiegni kode ahinya, gin jopuonjrene. Oseyiero ji 12 kuomgi mondo obed joote. Joote gin jopuonjre Yesu makende. Bende ing’eyo nyingegi?

Nitie Simon Petro gi owadgi ma Andrea. Kendo nitie Jakobo gi Johana, ma bende gin owete. Jaote moro bende iluongo ni Jakobo, to moro machielo iluongo ni Simon mopogore gi Simon Petro. Joote ariyo iluongo ni Judas. Achiel en Judas Iskariot, to Judas machielono iluongo bende gi nying mar Thaddayo. Kendo nitie Filipo gi Nathanael (ma bende iluongo ni Bartholomayo), kod Mathayo gi Thoma.

Bang’ duogo koa Samaria, Yesu ne okwongo chako lendo kowacho ni: ‘Pinyruodh Nyasaye okayo machiegni.’ Be ing’eyo gima pinyruodhno en? En sirkal madier mar Nyasaye. Yesu e ruoth e pinyruodhno. Obiro locho ka en e polo, kendo obiro kelo kuwe e piny. Pinyruodh Nyasaye biro loko piny mangima mondo obed paradis maber.

Yesu puonjo ji wach pinyruodhno kae. Owacho ni: ‘Ma e kaka onego ulem. Wuonwa manie polo, nyingi mondo omi luor. Pinyruodhi mondo obi. Dwaroni mondo otimre e piny kaka timore e polo.’ Ji mang’eny luongo lemoni ni ‘Lamo mar Ruoth.’ Jomoko to luonge ni ‘Lamo mar Wuoro.’ Be inyalo wacho lamono duto?

Yesu bende puonjo ji kaka onego gitim ne jomoko. Owacho ni: ‘Gigo mudwaro mondo ji otimnu, un bende timnigiuru kamano.’ Donge ihero ka jomoko timoni timbe ng’wono? Kuom mano, Yesu wacho ni, onego wanyis ng’wono ne joma moko. Donge nobed gima ber ahinya e paradis e piny kae kinde ma ji duto biro timo mani?