NENORE ni Yesu nigi mirima kae, donge? Be ing’eyo gimomiyo iye owang’ ahinya? En nikech joma ni e hekalu mar Nyasaye e dala mar Jerusalem, gin jowuoro ahinya. Gitemo loso pesa mang’eny ahinya kuom joma obiro kae lamo Nyasaye.

Be ineno nyiruedhigo duto gi rombe kod akuche? Ee, jogo uso jamni-gi ei hekalu kae. Be ing’eyo gimomiyo? En nikech Jo-Israel dwaro jamni kod winy mondo gigol kaka misango ni Nyasaye.

Chik Nyasaye ne wacho ni, ka Ja-Israel otimo richo, onego ogol chiwo ne Nyasaye. Kendo nitie kinde mamoko bende ma nidwaro ni Jo-Israel ogol chiwo. Kata kamano, ere kama Ja-Israel ne nyalo yudoe winy kata jamni mondo gichiw ne Nyasaye?

Jo-Israel moko ne nikod winy koda jamni ma mekgi. Kuom mano, ne ginyalo chiwogi. Kata kamano, Jo-Israel mang’eny ne onge gi jamni kata winy. Kendo moko kuomgi ne odak mabor ahinya gi Jerusalem ma ne miyo ok ginyal kelo achiel kuom jambgi e hekalu. Kuom mano, ji ne biro kae, to nyiewo jamni kod winy ma ne gidwaro. Kata kamano, jogi ne kawo pesa mang’eny ahinya kuom ji. Ne giwuondo ji. Bende, ok onego bedni giloko ei hekalu mar Nyasaye kae.

Ma e gima miyo Yesu bedo gi mirima. Kuom mano, oloko mese joma nigi pesago, kendo okeyo pesegigo. Bende okawo tonde, olosogo del, kendo oriembo jamni duto oko mar hekalu. Ochiko joma uso akuche ni: ‘Golgi uru kae! Weuru loko od Wuora obed kar loso pesa mang’eny ahinya.’

Jolup Yesu moko nikode kae, e hekalu man Jerusalem. Giwuoro gima gineno ka Yesu timo. Bang’ mano, giparo kama Muma wacho kuom Wuod Nyasaye ni: ‘Hera mar od Nyasaye nowang’ e chunye kaka mach.’

Kinde ma Yesu ni Jerusalem kae nikech Pasaka, otimo honni mang’eny. Bang’e, Yesu a Judea kendo ochako wuoth mar dok Galili. To ka en e yo mar dok kuro, okalo e piny Samaria. We mondo wane gima timore kuro.