CHIENG’ moro, Yesu nyiso ng’at moro ni onego oher wadgi. Ng’atno penjo Yesu: ‘Wadwa to en ng’a?’ Yesu ong’eyo gima ng’atni paro. Ng’atni paro ni jogo mawuok e oganda mare kod din mare e jowetene kende. Kuom mano, we wane gima Yesu wachone.

Nitie kinde ma Yesu puonjo kotiyo gi sigana. Mani e gima koro otimo. Ochiwo sigana mar Ja-Yahudi kod Ja-Samaria moro. Wase puonjore ni Jo-Yahudi mang’eny ok ohero Jo-Samaria. Mani e sigana ma Yesu chiwo:

Chieng’ moro, ne nitie Ja-Yahudi ma ne ridore e yo madhi Jeriko. Kata kamano, jomecho ne omonje. Ne gikawo pesane ma gigoye, kendo giweye kochiegni tho.

Bang’e, jadolo ma Ja-Yahudi ne oluwo yorno. Ne oneno ng’at ma ne jomecho ogoyono. Iparo ni ne otimo ang’o? En ne ong’ado e bath yo mokadho akadha. Bang’ mano, ng’at machielo ma bende en ja-din sidang’, noluwo yorno. Ne en Ja-Lawi. Be ne ochung’? Ooyo, en bende ne ok ochung’ mondo okony ng’at ma ne jomecho ogoyoni. E chonde-gi, inyalo neno jadolo gi Ja-Lawi karidore e yorno.

Kata kamano, ne ane ng’at man kod ng’ama ne jomecho ogoyoni. En Ja-Samaria. Kendo okonyo Ja-Yahudi. Oketo yath e adhonde ng’atni. Bang’ mano, okawo Ja-Yahudini kendo otere kama onyalo yweyoe nyaka ochangi.

Bang’ tieko sigana mare, Yesu nyiso ng’ano ma ne openje penjono: ‘Kuom ji adekgi en ng’ano miparo ni ne otimo ka wadgi ng’at ma ne jomecho ogoyono? Be ne en jadolo, Ja-Lawi koso Ja-Samaria?’

Ng’atno dwoko ni: ‘Ja-Samaria. Ne onyiso ng’wono ni jal ma jomecho nogoyono.’

Yesu wachone ni: ‘Idwoko kare. Kuom mano, dhi mondo itim ne jomoko kaka jalo notimo.’

Donge ihero yo ma Yesu tiyogo e puonjo? Wanyalo puonjore gik mang’eny mabeyo ahinya, ka wawinjo gik ma Yesu wacho e Muma, donge?