ANG’O ma ineno kae? Ee, jolweny moidho farese marochere. Kata kamano, ne ane kama gi aye. Faresego ringo ka gia e boche mag polo! Be nitie farese madier e polo?

Ooyo, magi ok gin farese madier. Wang’eyo mano nikech farese ok nyal ringo e boche, donge? Kata kamano, Muma wuoyo kuom farese manie polo. Bende ing’eyo gimomiyo Muma wuoyo kamano?

En nikech chon ne itiyo gi farese ka ikedo e lwenje. Kuom mano, Muma wuoyo kuom ji moidho farese ka wuok e polo, to mano nyiso ni Nyasaye nikod lweny ma onego ogo gi ji modak e piny. Bende ing’eyo kaka iluongo kama igoyoe lwenyno? Har-Magedon. Lwenyno en mar tieko richo duto manie piny.

Yesu ema biro telo e goyo lweny mar Har-Magedon. Ng’e ni Yesu ema Jehova ne oyiero mondo obed ruoth e sirkand Jehova. Mano ema omiyo Yesu rwako osimbo mar ruoth e wiye. Ligangla moting’ono nyiso ni obiro nego wasik Nyasaye duto. Be onego wawuor ni Nyasaye biro ketho jo maricho duto?

Ng’i ane chien e Sigana mar 10. Ang’o ma ineno kanyo? Ee, ataro maduong’ mar pi ma ne onego jo maricho. En ng’a ma ne okelo Atarono? Jehova Nyasaye. Koro ng’i ane Sigana mar 15. Ang’o matimore kanyo? Sodom gi Gomora iketho gi mach ma Jehova ne ooro.

Dog chien e Sigana mar 33. Ne gima timore ne farese mag Jo-Misri. Ng’ano ma ne omiyo pi obiro ma onegogi? Jehova. Ne otimo mano mondo orit joge. Ng’i ane Sigana mar 76. Ibiro neno kanyo ni Jehova ne oweyo kata mana joge ma Jo-Israel, mondo okethi nikech richogi.

Kuom mano, koro kik wawuor ni Jehova biro oro jolweny mage mani e polo mondo otiek richo duto mani e piny. Kata kamano, par ane gima mano biro nyiso! Lok ane kalatas mondo wane.