SULA MAR 8

Anyalo timo ang’o mondo abed gi osiepe mabeyo?

“Sama iya owang’, agomboga ng’at ma anyalo nyiso kaka awinjo. To sama gimoro ochwanya, agomboga ng’at ma nyalo hoya. Sama amor, agomboga bedo gi ng’at ma mor kaka amor. Aneno ni bedo gi osiepe en gima dwarore.”​—Brittany.

Nyithindo dwaroga joma gitugogo, to rowere to dwaroga joma nyalo bedo osiepegi. Pogruok en mane?

Nyithindo dwaro joma ginyalo tugogo.

Rowere to dwaroga joma nyalo konyogi kendo sirogi.

E wi mago, Muma wacho ni “osiep madier nyiso hera ndalo duto, kendo en owadu ma ne onyuol mondo okonyi chieng’ chandruok.” (Ngeche 17:17) Mano nyalo bedo osiep ma opogore gi osiepe ma ne itugogago ka ne pod in nyathi matin!

Adier: Kaka imedo dongo e kaka ibiro dwaro osiepe ma

1. Nigi kido mabeyo

2. Nigi timbe mabeyo

3. Nyalo konyi mondo ibed ng’at maber

Penjo: Ere kaka inyalo yudo osiepe kaka mago? We wanon ane weche ma luwogi:

Okang’ #1​—Osiep ma Nigi Kido Mabeyo

Gik monego ing’e. Ji duto ok nyal bedo osiepeni madier. Muma bende wacho ni ‘nitie osiep ma oikore hinyo nyawadgi.’ (Ngeche 18:24) Wachno nyalo kawi gi wuoro. Kata kamano, par ane wachni: Be ng’ato osegabedo osiepni mana nikech nitie gima onyalo yudo kuomi? To nade osiepe ma kuodhi kata wacho weche mag miriambo kuomi? Gik ma kamago nyalo miyo iwe geno osiepe ma kamago. a Kinde duto par ni ber mondo ibed gi osiepe matin mabeyo moloyo bedo gi osiepe mathoth ma ok konyi!

Gima inyalo timo. Yier osiepe ma nigi kido mabeyo minyalo luwo.

“Ji duto ne wuoyo maber e wi osiepna miluongo ni Fiona. An be daher ni ji owuo maber kuoma kamano. Adwaro ni abed gi nying maber kaka en. Aneno ni mano en gima maber.”​—Yvette, 17.

Tem ane timo kama.

1. Som Jo-Galatia 5:22, 23.

2. Penjri kama, ‘Be osiepena nigi kido mikwano e kind “olembe ma roho nyago”?’

3. Ndik ane piny kae nyinge mag osiepeni mihero ahinya. E bath moro ka moro, ndik kido maduong’ ma osiepnino nigo.

Nying

․․․․․

Kido

․․․․․

Ng’e wachni: Ka po ni kido maricho kende e ma osiepeni nigo, nyalo dwarore ni imany osiepe mamoko mabeyo!

Okang’ mar #2​—Osiep ma Nigi Timbe Mabeyo

Gik monego ing’e. Ka igombo ahinya mondo ibed gi osiepe, mano nyalo miyo iyie bedo gi osiepe maricho. Muma wacho niya: “Osiep jo mofuwo biro hinyore.” (Ngeche 13:20) “Jo mofuwo” ma ndikoni wuoyoe ok gin joma rem-ga e penj e skul kata joma onge rieko. Kar mano, gin joma ok oikore winjo weche mag rieko. Mago gin osiepe ma ok onego ibedgo!

Gima inyalo timo. Kik imak osiep gi ng’ato ang’ata miyudo. (Zaburi 26:4) Mano ok nyis ni ibuono ji. Kar mano, onyiso ni itiyo gi rieko mondo ine “pogruok ma nitie e kind ng’at makare gi jaricho, kendo e kind ng’at ma tiyo ne Nyasaye kod ma ok tine.”​—Malaki 3:18.

“Amor ni jonyuolna nokonya mondo ayud osiepe ma mbesena modak kaluwore gi puonj mag Muma.”​—Christopher, 13.

Dwok penjo ma luwogi:

Sama an gi osiepena, be aluorga ni ginyalo chuna mondo atim gima ang’eyo ni rach?

□ Ee

□ Ooyo

Dibed ni ok adwar nyiso jonyuolna osiepena nikech ang’eyo ni samoro ok gibi yie kodgi?

□ Ee

□ Ooyo

Ng’e wachni: Ka po ni idwoko ni ee e penjo man malogo, yier osiepe ma nigi kido mabeyo kendo modak kaluwore gi puonj mag Jokristo.

Okang’ mar #3​—Osiep Manyalo Konyi Mondo Ibed Ng’at Maber

Gik monego ing’e. Muma wacho niya: “Osiepe maricho ketho timbe mabeyo.” (1 Jo-Korintho 15:33) Rawera moro miluongo ni Lauren wacho kama: “Joskul wetena ne yiega koda sama atimo gik moko duto ma ne ginyisa ni atim. Nawinjoga ka an kenda, omiyo ne ayie timo gik ma gidwaro mondo giyie koda.” Lauren nofwenyo ni ka iluwo mana gik ma jomoko timo, ibedo ka gir tugo ma gichiko kaka gin e ma gidwaro. Kik iyie bedo kamano!

Gima inyalo timo. Weri gi osiepe ma dwaro mana ni ibed kaka gin. Timo kamano nyalo miyo ibed gi osiepe matin; kata kamano, ibiro bedo mamor kendo ibiro yudo osiepe mabeyo ma biro konyi mondo itim gik mabeyo.​—Jo-Rumi 12:2.

“Osiepna miluongo ni Clint en ng’at ma ok kal tong’ kendo ma kecho ji, to timbene mabeyogo osejiwa ahinya.”​—Jason, 21.

Penjri ane penjo ma luwogi:

Be alokoga yo ma arwakorago, kaka awuoyo, kendo timo gik maricho mana ni mondo amor osiepena?

□ Ee

□ Ooyo

Be adhiga gi osiepena kuonde maricho ma dine ok adhiye ka an kenda?

□ Ee

□ Ooyo

Ng’e wachni: Ka po ni idwoko ni ee e penjo man malogo, kwa kony kuom jonyuolni kata kuom ng’at moro maduong’ ma nyalo ng’adoni rieko. Ka in achiel kuom Joneno mag Jehova, inyalo dhi ir jaduong’-kanyakla mondo inyise ni diher ni okonyi yiero osiepe mabeyo ma biro konyi mondo itim gik mabeyo.

SOM WECHE MOMEDORE E WI WACHNI E BUK MAR 2, SULA MAR 9

E SULA MA LUWO

Be osiepni moro chiki mondo itim gik maricho koso chunyi e ma chiki kamano? Non ane gima inyalo timo!

[Weche moler piny]

NDIKO MADUONG’ MIWUOYOE

“Nitie osiep ma makore gi nyawadgi moloyo kata owadgi.”—Ngeche 18:24.

GIMA INYALO TIMO

Ka idak ka luwore gi puonj mag Muma, ibiro yudo jomamoko ma bende temo timo kamano. Gibiro bedo osiepeni mabeyo ahinya!

BE ING’EYO . . . ?

Nyasaye ok buon ji, kata kamano, oyieroga ng’at ma doher ni obed ‘wendo e hema mare.’​—Zaburi 15:1-5

GIK MACHANO TIMO!

Mondo ayud osiepe mabeyo, abiro ․․․․․

Moko kuom joma dongo moloya ma daher ng’eyo maber gin ․․․․․

Gik ma daher penjo janyuolna (kata jonyuolna) e wi wachni gin ․․․․․

IPARO NADE?

● Gin kido mage ma diher ni osiepni obedgo, to nikech ang’o?

● Gin lokruoge mage ma dwarore ni itim mondo ibed osiep maber?

[Blab]

“Ka jonyuolna nonyisa mondo awera gi osiepe moko, ne aneno ni mago kende e osiepe ma anyalo bedogo. Paro ma ne jonyuolna ong’adona ne ber ahinya, kendo bang’ paro matut e wi wachno, nafwenyo ni nitie osiepe mang’eny mabeyo ma ne anyalo bedogo.”​—Cole

[Sanduk]

tem ane tiyo gi yoregi

Wuo gi jonyuolni e wi bedo gi osiepe. Penjgi ni ne gin gi osiepe machalo nade ka ne girom kodi. Be giywago ang’e nikech osiepe ma ne giyiero? Ka en kamano, to ang’o momiyo giywago ang’e? Penjgi gima inyalo timo mondo kik iyud chandruoge ma ne giyudo.

Tem mondo osiepeni ong’ere gi jonyuolni. Ka po ni idigni timo kamano, penjri niya, ‘Ang’o momiyo aluor nyiso jonyuolna osiepena?’ Be nitie gimoro ma osiepeni ohero timo ming’eyo ni jonyuolni ok bi yiego? Ka en kamano, nyalo dwarore ni iti gi rieko e yiero osiepeni.

Bed ng’at ma chiko ite malong’o. Nyis ni idewo kaka osiepni winjo.​—Jo-Filipi 2:4.

We ne ji kethogi. Kik igen ni osiepeni biro timo gik makare chuth. “Waduto wachwanyore nyading’eny.”​—Jakobo 3:2.

Mi osiepni thuolo mar timo gike. Kik ichunj kuom osiepni seche te. Osiep madier biro konyi sama idwaro kony.​—Eklesiastes 4:9, 10.

[Picha]

Ka iluwo mana gik ma jomoko timo, ibedo ka gir tugo ma gin e ma gichiko