SULA MAR 25

Ere kaka anyalo loyo tim mar tugo gi duong’na e tieko gombo mag nindruok?

“Nachako tugo gi duong’na mondo atiek gombo mag nindruok ka ne an jahigni aboro. Bang’e, napuonjora paro ma Jehova ne nigo e wi wachno. Kinde moro amora ma natimo timno, chunya ne chanda ahinya. Napenjora niya: ‘Ere kaka Nyasaye nyalo hero ng’at ma timo timbe kaka mago?’”​—Luiz.

Ka ichopo e higni ma rowere chako bedo joma dongo, gombo mag nindruok nyalo bedo motegno ahinya. Mano nyalo miyo idonj e tim mar tugo gi duong’ni e tieko gombo mag nindruok. a Ng’eny ji nyalo paro ni mano ok gima lich ka giwacho niya: “Onge ng’at ma ichwanyo.” Kata kamano, nitie gimomiyo ok onego wadonj e timno. Jaote Paulo nondiko niya: “Kuom mano, neguru fuonni mag ringreu . . . ka uweyo . . . owruok gi gombo mag terruok.” (Jo-Kolosai 3:5) Tugo gi duong’ni mondo itiek gombo mag nindruok kwedo gima ndikono wacho, to omedo mana jimbo gombogo. E wi mano, ne ane weche ma luwogi:

● Ng’at ma tugo gi duong’ne mondo otiek gombo mag nindruok, keto pache kuome owuon. Kuom ranyisi, sama ng’ato tugo gi duong’ne mondo otiek gombo mag nindruok, oketo pache mana e gik ma moro dende.

● Ng’at ma tugo gi duong’ne e tieko gombo mag nindruok, neno jomamoko kaka gik ma inyalo tigo e tieko gombogo.

● Ng’at ma tugo gi duong’ne e tieko gombo mag nindruok paro mana gik ma more en owuon, to mano nyalo miyo oyud ka tekne chopo gombo mag nindruok e kend.

Kar tugo gi duong’ni e tieko gombo mag nindruok, tem matek mondo inyag kido mar ritruok. (1 Jo-Thesalonika 4:4, 5) Muma konyowa kaka wanyalo timo mano, kojiwowa ni watang’ gi gik ma nyalo chiero gombo mag nindruok. (Ngeche 5:8, 9) To nade ka iseng’iyo gi timno? Nyalo bedo ni isetemo ni mondo iwe timno to otami. Inyalo paro ni ok inyal weyo timno kendo dak kaluwore gi chike Nyasaye. Mano e paro ma wuoyi moro miluongo ni Pedro ne nigo kuome. Owacho kama: “Sa asaya ma ne adok e timno, chunya ne chanda marach. Naparo ni Nyasaye ne ok nyal ng’wonona. Ne ok anyal kata lemo.”

Ka po ni mano e kaka in be iwinjo, bed gi chir. Mano ok nyis ni ok nyal konyi. Nitie rowere kod joma dongo ma osekedo gi tim mar tugo gi duong’gi mondo gitiek gombo mag nindruok ma giloyo. In be inyalo.

Ang’o ma inyalo timo mondo chunyi kik chandi?

Mana kaka waseneno, joma osedonjo e tim mar tugo gi duong’gi e tieko gombo mag nindruok osebedo gi chuny ma chandore ahinya. Onge kiawa ni bedo gi “kuyo ma Nyasaye dwaro” nyalo konyi mondo ilo timno. (2 Jo-Korintho 7:11) Kata kamano, ka chunyi chandi mokalo tong’, mano nyalo kelo hinyruok moko. Onyalo miyo chunyi nyosre ma iwe timo kinda mar loyo timno.​—Ngeche 24:10.

Omiyo, tem bedo gi paro mowinjore e wi chal ma intie. Tugo gi duong’ni mondo itiek gombo mag nindruok en tim ma ok ler. Onyalo miyo ibed “misumba mar gombo kod mor mopogore opogore,” kendo omiyo ng’ato bedo gi paro ma ok kare. (Tito 3:3) E wi mano, timno ok en achiel kuom timbe madongo mag terruok, kaka chode. (Juda 7) Ka isedonjo e timno, kik ipar ni isetimo richo maduong’ ma ok nyal wene ng’ato. Gima duong’ en ni chunyi kik jog gi thiro timno kendo kik iol gi kedo kode!

Yot ahinya mondo chuny ng’ato onyosre ka ochako okier modok e timno. Dok e timno ok nyis ni koro in jaricho. Omiyo kik ijog. Kar mano, tem nono gimomiyo ne idok e timno, kendo tem matek mondo kik inwo timo gino.

Par matut kaka Nyasaye en jahera kendo ng’at mang’won. Daudi, jal ma notimo richo nikech nyawo mage nowacho kama: “Mana kaka wuoro kechoga nyithinde, e kaka Jehova kechoga jo moluore. Nimar ong’eyo kaka ochueyowa, ong’eyo maler ni wan mana buru.” (Zaburi 103:13, 14) Ee, Jehova ong’eyo ni wan joma ok kare kendo ‘oikore weyonwa richowa.’ (Zaburi 86:5) Kata kamano, odwaro ni wan be watim kinda mondo walokre. Omiyo, ang’o ma inyalo timo mondo ilo timno?

Non yoreni mag manyo mor. Dibed ni ihero neno movie, programbe mag TV, kata ihero dhi e websait ma jiwo timbe mag nindruok? Jandik Zaburi moro nolemo kokwayo Nyasaye kama: “Lok wang’a kik ong’i gik ma kayiem nono.” b​—Zaburi 119:37.

Chun pachi mondo opar gik mamoko. Jakristo moro miluongo ni William wacho niya: “Ka pok idhi nindo, som gimoro motudore gi wach Nyasaye. En gima ber ahinya ka gima iparo mogik e odiechieng’ otudore gi wach Nyasaye.”​—Jo-Filipi 4:8.

Wuo gi ng’ato e wi wachno. Wich-kuot nyalo moni nyiso ng’ato gima chandi. To par niya, nyiso ng’ato gima chandi nyalo resi! Mano e gima Jakristo moro miluongo ni David nofwenyo. Owacho niya: “Nawuoyo gi wuonwa ka wan ji ariyo. Wiya ok bi wil gi gima nonyisa. Nonyisa ka omor ahinya niya: ‘Imoro chunya wuoda.’ Nong’eyo ni nachoko chir ahinya mondo anyise wachno. Mano e jip ma nadwaro gie sechego, to nokonya timo lokruok ma ne dwarore.

“Wuonwa notiyo gi ndiko moko mondo okonya neno ni ne ‘ok an jaricho ruok,’ bende notiyo gi ndiko mamoko e konya neno rach mar gima ne atimono. Ne wawuoyo kuom thuolo moromo kae to onyisa ni pod wabiro wuoyo momedore. Nonyisa ni ka po ni akier ma adok e timno, kik chunya nyosre, to atem matek mondo kinde malach okal ka pok gima kamano otimorena kendo.” David tieko kowacho niya: “Bedo ni nanyiso ng’at machielo gima ne chanda kae to omiya paro moko mabeyo nokonya ahinya.” c

E SULA MA LUWO

Be nindruok e kind joma ok okendore en richo? Non ane.

[Weche moler piny]

NDIKO MADUONG’ MIWUOYOE

“Ring gombo mag rowere, to law tim makare, gi yie, gi hera, kod kuwe kanyachiel gi jo ma luongo Ruoth gi chuny maler.”​—2 Timotheo 2:22.

GIMA INYALO TIMO

Lem ka pok gombo oloyi. Kwa Jehova omiyi “teko mokalo ma pile” mondo inyagri gi temno.​—2 Jo-Korintho 4:7

BE ING’EYO . . . ?

Ng’at ma yomyom nyalo donjo e obadho mar tieko gombo mag nindruok sa asaya ma gombogo obirone. Kata kamano, ng’at ma jachir biro nyiso kido mar ritruok kata sama en kar kende.

GIK MACHANO TIMO!

Anyalo paro gik maler sama ․․․․․

Kar weyo mondo gombo oloya, abiro ․․․․․

Gik ma daher penjo janyuolna (kata jonyuolna) e wi wachni gin ․․․․․

IPARO NADE?

● Ang’o momiyo ber ng’eyo ni Jehova ‘oikore weyo ne ji richogi’?​—Zaburi 86:5.

● Nikech Nyasaye ma ne ochueyowa gi gombo mag nindruok e ma nyisowa ni wabed gi kido mar ritruok, mano nyiso ni en gadier ni inyalo timo ang’o?

[Blab]

Nyaka ne awera gi timno, asebedo ka an gi chuny maler e nyim Jehova, kendo onge gima dapim gi mano!’’​—Sarah

[Picha]

Ng’ato ka okier sama oringo, mano ok nyis ni onego ochak kendo. Kamano bende, sama ng’ato okier modok e tim mar tugo gi duong’ne e tieko gombo mag nindruok, mano ok ruch dongruok ma osebedo kotimo mondo owe timno.