BE IPARO gimomiyo achiel kuom malaike mag Nyasaye nolokore mobedo Satan Jachien?​—Nogombo ni ji olame to mano e ma omomiyo nong’anyo ne Nyasaye. Be malaike mamoko noluwo Satan?​—Ee, en kamano. Muma luongogi ni ‘malaike mag Satan,’ kata jochiende.​—Fweny 12:9.

Be malaike marichogo kata jochiende oyie kuom Nyasaye?​—Muma wacho ni ‘Jochiende be oyie ni Nyasaye nitie.’ (Jakobo 2:19) Kata kamano, sani to giluor. Mano en nikech ging’eyo ni Nyasaye biro kumogi nikech gik maricho ma gisetimo. Gin gik mage maricho ma gisetimo?​—

Muma wacho ni malaikego noweyo kar dakgi e polo mi gibiro dak e piny kae kaka dhano. Ne gitimo kamano nikech ne gidwaro nindo gi mon mabeyo ma ne nie piny. (Chakruok 6:1, 2; Juda 6) Ing’eyo ni nindruok en ang’o?​—

Nindruok en sama dichwo gi dhako obedo machiegni ahinya e yo makende. Bang’ mano, nyathi nyalo chako dongo ei min-gi. Kata kamano, malaike ok onego otim timbe mag nindruok. Nyasaye dwaro ni dichwo gi dhako mokendore kende e ma otim timbe mag nindruok. E yo ma kamano, ka ginyuolo nyathi, to giduto gibiro rite maber.

Sama malaike nokawo del mar dhano kendo ginindo gi mon manie piny, ne ginyuolo nyithindo ma bang’e nobedo joma robede ahinya. Ne giger kendo ne gihinyo ji. Omiyo Nyasaye nokelo ataro ma ne okethogi kaachiel gi dhano maricho duto. Kata kamano, Nyasaye nonyiso Noa mondo oger yie maduong’ mondo ores jomoko manok ma ne timo gik makare. Japuonj Maduong’ nowacho ni dwarore ni wapar gima ne otimore e ndalo Ataro.​—Chakruok 6:3, 4, 13, 14; Luka 17:26, 27.

Be ing’eyo gima ne otimore ne malaike maricho e ndalo Ataro?​—Ne giweyo del mar dhano mi gidok e polo. Kata kamano, koro ne ok gin malaike mag Nyasaye, omiyo ne gibedo jochiende kata malaike mag Satan. To ang’o ma ne otimore ne nyithindo ma robede ma ne ginyuolo?​—Ne githo e Ataro. Ji mamoko duto ma ne ok owinjo Nyasaye bende notho.

Chakre kinde mar Ataro, Nyasaye pok oyiene jochiende mondo ochak okaw del mar dhano. Kata obedo ni ok wanyal neno jochiende, pod gimiyo dhano timo gik maricho ahinya. Gisebedo ka gitimo gik maricho mohingo kinde moro amora mosekalo. To mano en nikech osegolgi e polo mi owitgi e piny.

Be ing’eyo gimomiyo ok wanyal neno jochiende?​—En nikech gin chuech mag roho ma ok ne. Kata kamano, wan gadier ni gintie. Muma wacho ni Satan ‘osebedo ka wuondo ji e piny mangima,’ kendo jochiendene bende konye.​—Fweny 12:9, 12.

Be Jachien kaachiel gi jochiende nyalo wuondowa?​—Ee, ginyalo wuondowa ka ok watang’. Kata kamano, ok onego waluor. Japuonj Maduong nowacho niya: ‘Jachien onge gi teko kuoma.’ Ka wasudo machiegni gi Nyasaye, obiro ritowa mondo Jachien gi jochiendene kik hinywa.​—Johana 14:30.

Dwarore ni wang’e gik maricho ma jochiende nyalo dwaro ni watim. Omiyo tem paro gigo. Gin timbe mage maricho ma jochiende notimo ka ne gibiro e piny?​—Ka ne Ataro podi, ne giterore gi mon, to mano en gima malaike ne ok onego otim. Kindegi jochiende mor ahinya neno ka ji ok luw chike mag Nyasaye motudore gi weche mag nindruok. We apenjie, Gin jomage ma oyienegi mondo otim timbe mag nindruok?​—In kare, mana joma okendore kende.

Kindegi yawuoyi moko matindo kaachiel gi nyiri moko ohero timo timbe mag nindruok, to mano en gima rach ahinya ka gitimo. Muma wuoyo e wi ‘duong’ mar dichwo.’ (Tim Jo-Lawi 15:1-3) Dug ng’at ma dhako iluongo ni duong’ne. Jehova nochueyo fuonnigo mondo joma okendore oyudgo mor. Jochiende morga ahinya sama ji timo gik ma ok mor Jehova. Kuom ranyisi, jochiende morga ahinya sama nyako kata wuoyi tugo gi duong’ mar nyawadgi. Ok wadwar ni wamor jochiende, donge?​—

Nitiere gimoro machielo ma jochiende ohero to Jehova ok ohero. Be ing’eyo ni en ang’o?​—Timbe gero. (Zaburi 11:5) Inyalo wach ni ng’ato nigi timbe gero ka okwiny kendo ohinyo jowetene. Par ni mago e gik ma yawuot jochiende notimo.

Jochiende ohero buogo ji. Seche moko giwuondorega ni gin joma ne osetho. Ginyalo kata kopo dwond joma ne osetho. E yo ma kamano, jochiende wuondo ji ni joma otho pod ngima kendo ginyalo wuoyo kodgi. Ee, jochiende wuondo ji ni joma otho nyalo chienogi.

Omiyo nyaka wabed motang’ mondo Satan kaachiel gi jochiendene kik wuondwa. Muma siemowa kama: ‘Satan wuondore mondo onenre kaka malaika maber, to jotichne bende timo kamano.’ (2 Jo-Korintho 11:14, 15) Kata kamano, jochiende richo. Wane ane kaka ginyalo temo wuondowa mondo wachal kodgi.

Kanye ma ji puonjoregae timbe gero, nindruok e kind joma ok okendore, kod tudruok gi jochiende?​—Donge giyudore e programbe mag TV, tuke mag kompyuta, intanet, kod buge ma ji somo? Be gigo kelowa machiegni gi Nyasaye koso gi Jachien kod jochiendene? Iparo nade?​—

Ng’ano ma dwaro ni wawinj kendo wane gik maricho?​—Ee, en Satan kod jochiendene. Omiyo ang’o monego watim?​—Onego wasom, wawinj, kendo wane gik mabeyo ma biro konyowa tiyo ne Jehova. Be inyalo paro moko kuom gik mabeyo ma wanyalo timo?​—

Ka watimo gik mabeyo, onge tiende mondo waluor jochiende. Yesu oloyogi gi teko kendo giluore. Chieng’ moro jochiende noywak matek ne Yesu ka giwacho niya: “Ibiro mondo ikethwa, koso?” (Mariko 1:24) Donge en adier ni wabiro bedo mamor neno ka Yesu ketho Satan kod jochiendene?​—Ka pod warito kindeno, wanyalo bedo gadier ni Yesu biro ritowa mondo jochiende kik hinywa, to mana ka wasudo machiegni kode kaachiel gi Wuon-gi manie polo.