Ne Jasombwa:

‘Bi ibed jalupna.’ (Mariko 10:21) Kata obedo ni Yesu notiyo gi wechego kowuoyo gi ng’at achiel, nojiwowa waduto mondo waluwe. Be ibiro yie luwo Yesu? Timo kamano biro loko ngimani e yo malach. Nikech ang’o?

Jehova nooro Wuode ma miderma e piny mondo ochiw ngimane kaka rawar. (Johana 3:16) Mopogore gi thonwa, Yesu nonyisowa kaka onego wadag. E gik moko duto ma notimo e ngimane, nosiko komakore gi Wuon-gi kendo mano nomiyo Wuon-gi obedo mamor. Bende, Yesu nonyisowa kaka wanyalo bedo gi kido kaka mag Wuon-gi. Dwach Jehova kod yore ma otimogo gik moko nonenore maler e weche ma ne Wuode wacho kod e gik ma notimo.​—Johana 14:9.

Muma wacho ni Yesu ‘noweyonwa ranyisi maber mondo waluw ondamo mage machiegni.’ (1 Petro 2:21) Ka wadwaro bedo machiegni gi Jehova, dak e ngima maber sani, kendo siko e yo ma tero ji e ngima ma nyaka chieng’, nyaka waluw ondamo mag Yesu machiegni.

Mondo wachak wuotho e yorno, nyaka wang’e ngima ma Yesu nodakie ka ne en e pinyka. Omiyo, onego wanon matut weche ma Muma nyisowa e wi Yesu. Paro matut e wi weche ma Yesu nowacho kod gik ma notimo kendo nono kaka wanyalo luwo ranyisine, biro konyowa neno maler kaka wanyalo luwe.

Wageno ni bugni biro konyi mondo imed hero Jehova kod Yesu. We herano ochwali mondo imed luwo ondamo mag Yesu machiegni, mondo imi chuny Jehova obed mamor sani kendo nyaka chieng’.