1-6. Chiw ane ranyisi mar Joneno mag Jehova ma lendo e chal mopogore opogore.

 REBECCA en Janeno mar Jehova ma pod tin modak e piny Ghana. Nolendoga e skul kendo kinde duto noting’oga buge malero Muma e bagne mar skul. Sama ne gin e brek, nomanyoga thuolo mag lendo ne joskul wetene. Rebecca nochako puonjruok Muma gi joklasgi mang’eny.

² E chula mar Madagascar, ma yudore ugwe mar Afrika, nitie jopainia ariyo ma ne wuothoga kilomita 25 e chieng’ mager mondo gichop e gweng’ moro mosokore ahinya. Ne gitayoga puonjruok Muma gi joma orwako wach e alworano.

³ Joneno manie piny Paraguay kod jomamoko mochiwore moa e pinje 15, noloso yie mondo gidhi gilendnego joma odak machiegni gi aoche mag Paraguay kod Paraná. Yieno ma pekne romo tan 45 ne nyalo ting’o ji maromo 12. Jolendo mag Pinyruoth ma jokinda ne tiyoga gi yieno mondo giland wach maber e alwora ma ne ok nyal chopie e yo mayot.

⁴ Joneno mag Jehova modak yo nyandwat mar piny Alaska, ne lendoga ne welo mobiro limo pinygi e kinde ma piny liet. E kindego, yiedhi ne keloga welo moa e pinje mopogore opogore, kendo Joneno modak e alworano ne kawoga thuologi mondo gilend ne welogo ka gitiyo gi troli moting’o buge mogo e dhok mopogore opogore. E alworano, ndege konyoga e chopo kuonde mosokore, to mano miyo wach maber ilandoga e gwenge mag Aleut, Athabascan, Tsimshian, kod Tlingit.

⁵ Larry, modak Texas e piny Amerka, ne neno kama nodakie kaka alworane mar lendo. Nodak kama irite joma oti kod joma ong’ol. Larry nodich ahinya, kata obedo ni chakre oyud aksident nowuothoga mana gi wheelchair. Ne olandonega jomamoko wach Pinyruoth, moriwo geno ma Muma chiwo ni e bwo Pinyruodh Nyasaye, obiro wuotho kendo.​—Isa. 35:5, 6.

 ⁶ Mondo grup moro mar Joneno odhi e chokruok mar alwora e piny Myanmar, ne giwuotho wuodh ndalo adek gi yie ka giwuok Mandalay. Nikech ne gin gi siso mar lando wach maber, ne giting’o buge ma lero Muma kendo ne gimiyogi jowuoth wetegi. Sa asaya ma ne yie ochung’ e taon kata e gweng’ moro, jolendogo ne wuokga mapiyo ka gidhi kama ji odakie mondo gimigi buge ma lero Muma. Ka jolendogo noduogo, ne giyudoga ka jowuoth mamoko oidho yieno, kendo ne gilendonegiga.

7. Gin yore kaka mage ma jotich Jehova landogo wach Pinyruodh Nyasaye, to dwachgi maduong’ en mane?

⁷ Ranyisi matin mar owete gi nyimine ma wasewuoyego nyiso kaka jotich Jehova ma jokinda e piny mangima, ‘chiwo neno e okang’ mong’ith e wi Pinyruodh Nyasaye.’ (Tich 28:23) Gilendoga ot ka ot, e nderni, gindiko barupe, kendo gitiyo gi simu. Bed ni giidho mtoka, gidhi bayo kamoro, kata giyueyo kar tich, gimanyoga thuolo mar chiwo neno e wi Pinyruodh Nyasaye. Yore mag lendo nyalo pogore, kata kamano, dwachgi maduong’ en lando ne ji wach maber kamoro amora ma ginyalo yudoree.​—Mat. 10:11.

8, 9. (a) Ang’o momiyo wanyalo wacho ni medruok mosebedoe e tij lando wach Pinyruoth en hono? (b) En penjo mane maduong’ monego wapenjre, to ang’o monego watim mondo wayud dwoko mar penjono?

⁸ Be in achiel kuom joland Pinyruoth ma sani yudore e pinje mokalo 235? Ka en kamano, to in achiel kuom joma medo chwalo tij lando wach Pinyruoth! Gik mosetimore e tij lendo e piny mangima en hono. Kata obedo ni Joneno mag Jehova yudo chandruoge kaka marfuk kod sand mager, pod gidhi nyime chiwo neno e wi Pinyruodh Nyasaye ne ogendni duto.

⁹ Penjo maduong’ monego wapenjre en ni, Ang’o momiyo onge gimoro amora, kata mana sand moa kuom Satan mosechungo tij lando wach Pinyruoth? Mondo wadwok penjono, wanon ane gik ma ne otimore e kinde Jokristo mokwongo. Joneno mag Jehova ma kindegi pod dhi nyime gi tich ma ne ochakore e kinde Jokristo mokwongo.

10. Yesu nochiwore tiyo tich mane, to ang’o ma ne ong’eyo e wi tijno?

¹⁰ Yesu Kristo, ma ne ochako kanyakla mar Jokristo, nochiwore lando wach maber mar Pinyruodh Nyasaye; ne okawo tijno kaka tich maduong’ ahinya e ngimane. Kinde moro nowacho niya: “Nyaka aland wach maber mar Pinyruodh Nyasaye e mier mamoko bende nikech mano e momiyo ne oora.” (Luka 4:43) Yesu nong’eyo ni nochako tich ma ne ok odhi tieko kende. Kinde matin ka pok otho, nokoro ni wach Pinyruoth ne idhi land “e ogendni duto.” (Mar. 13:10) Kata kamano, ere kaka ne idhi land wachno, to jomage ma ne dhi lande?

11. En tich mane makende ma Yesu nomiyo jopuonjrene, to ang’o ma ne dhi konyogi tiyo tijno?

 ¹¹ Bang’ ka Yesu nosetho mi ochiere, nofwenyore ne jopuonjrene kendo nomiyogi tich makende konyisogi niya: “Dhiuru e ogendni duto mondo ulok ji obed jopuonjrena, kubatisogi e nying Wuoro, gi Wuoyi, gi roho maler, kendo kupuonjogi timo gik moko duto ma asechikou. To neuru! An kodu kinde duto nyaka e giko mar ndalo.” (Mat. 28:19, 20) Weche ma ne owacho ni “an kodu” nyiso ni ne odhi konyo jopuonjrene e tij lando wach maber kendo loko ji obed jopuonjre. Ne dwarore ni okonygi nikech Yesu nokoro ni ‘ogendni duto ne dhi sin kodgi.’ (Mat. 24:9) Nitie gimoro machielo ma bende ne dhi konyo jopuonjrene. Kinde matin ka pok Yesu odok e polo, nonyiso jopuonjrene ni nodhi miyogi teko kokalo kuom roho maler ma ne dhi konyogi chiwo neno “nyaka kuonde maboyo mogik e tung’ piny.”​—Tich 1:8.

12. Gin penjo mage madongo monego wapenjre, to ang’o momiyo dwarore ni wang’e dwoko mag penjogo?

¹² Koro we wapenjre ane penjo moko madongo: Be jopuonjre Yesu kod Jokristo mokwongo nokawo tij lendo e yo mapek? Be grup matin mar Jokristo mokwongo moting’o chwo gi mon nochiwo neno e okang’ mong’ith e wi Pinyruodh Nyasaye kata obedo ni ne giyudo sand mager? Be Jehova, Yesu, malaike, kaachiel gi roho maler, nokonyogi e tij loko ji obed jopuonjre? Dwoko mag penjogi kaachiel gi penjo mamoko motudore kodgi yudore e bug Tich Joote. Dwarore ni wang’e dwoko mag penjogo. Nikech ang’o? Yesu nosingo ni tich ma ne omiyo jopuonjrenego ne idhi tim nyaka “e giko mar ndalo.” Omiyo, tijni nyaka tim gi Jokristo madier duto moriwo nyaka wan ma wadak e kinde mag gikogi. Nikech mano, wan gi siso mar nono weche mondik e bug Tich Joote.

13, 14. (a) En ng’ano ma ne ondiko bug Tich Joote, to ere kaka noyudo weche ma ne ondiko? (b) Bug Tich Joote oting’o weche mage?

¹³ Ng’ano ma ne ondiko bug Tich Joote? Kata obedo ni bugno ok hul nying ng’at ma ne ondike, weche michakogo nyiso ni ne ondike gi ng’at ma ne ondiko Injili mar Luka. (Luka 1:1-4; Tich 1:1, 2) Omiyo chakre chon, Luka, ma en ‘laktar moher’ kendo jahistori molony e ma oseng’ere kaka ng’at ma ne ondiko bug Tich Joote. (Kol. 4:14) Bugno wuoyo e wi gik ma ne otimore kuom kinde ma dirom higni 28, chakre higa mar 33 B.K. ka ne Yesu odok e polo, nyaka e kinde ma ne otue jaote Paulo e jela e piny Rumi chiegni higa mar 61 B.K. Weche moko ma ne Luka ondiko nyiso ni en be ne entie ka gik ma ne ondikogo timore. (Tich 16:8-10; 20:5; 27:1) Nikech Luka ne en jatim nonro mong’ith, nenore maler ni noyudo wechene achiel kachiel kuom Paulo, Barnaba, Filipo, kod jomamoko ma ne owuoyo kuomgi e weche ma ne ondiko.

 ¹⁴ Bug Tich Joote oting’o weche mage? E bug Injili mar Luka, Luka nowuoyo e wi gik ma Yesu nowacho kod ma ne otimo. Kata kamano, e bug Tich Joote, Luka wuoyo e wi gik ma jopuonjre Yesu nowacho kod ma ne gitimo. Omiyo, bug Tich Joote wuoyo e wi joma ne otimo tije moko makende, kata obedo ni ji ne nenogi kaka “ji ajia ma ok osomo.” (Tich 4:13) E yo machuok, bug Tich Joote nyisowa kaka kanyakla mar Jokristo nochakore kod kaka nodongo. Bugno bende nyisowa yore ma ne gitiyogo e lando wach maber kod paro ma ne gin-go e wi tijno. (Tich 4:31; 5:42) Onyisowa bende kaka roho maler nokonyo e lando wach maber. (Tich 8:29, 39, 40; 13:1-3; 16:6; 18:24, 25) Bug Tich Joote jiwo wach maduong’ ma Muma wuoyoe moriwo keto nying Nyasaye obed maler kokalo kuom Pinyruodhe manie bwo Kristo, kendo onyisowa kaka wach maber nolandore ahinya kata obedo ni ne nitie akwede mager.​—Tich 8:12; 19:8; 28:30, 31.

15. Gin ber mage ma wabiro yudo sama wanono bug Tich Joote?

¹⁵ Kuom adier, nono bug Tich Joote jiwowa kendo tego yie marwa! Paro matut chir kod kinda ma jolup Kristo mokwongo ne nigo, biro mulo chunywa. Timo kamano biro jiwowa mondo waluw yie mar Jokristo mokwongo. Mano biro miyo wabed moikore chopo tich momiwa mar ‘dhi loko ji obed jopuonjre.’ Buk ma koro isomoni olos mondo okonyi nono adimba bug Tich Joote.

16. Weche adek madongo momiyo ogo bugni gin mage?

¹⁶ Gima duong’ momiyo ogo bugni en ang’o? Ogoye mondo okonywa e yore adek ma gin (1) mondo wabed gadier chuth ni Jehova tiyo gi rohone maler e konyowa lando wach Pinyruoth kendo loko ji obed jopuonjre, (2) mondo okonywa medo kinda e tij lendo ka wanono ranyisi mar jolup Kristo mokwongo, kae to mar (3) mondo wamed chiwo luor ne riwruok mar oganda Jehova kod joma tayo tij lendo gi tije mag kanyakla.

17, 18. Ere kaka ochan bugni, to gin gik mage manie iye ma nyalo konyi timo puonjruok mari mar Muma?

¹⁷ Ere kaka ochan weche manie bugni? Ibiro fwenyo ni opoge e kidienje aboro, kendo moro ka moro wuoyo e wi weche moko ma yudore bug Tich Joote. Sula ma luwo mag bugni ok wuo kuom wes ka wes mar bug Tich Joote, to gikonyowa yudo puonj kuom gik ma ne otimore miwuoyoe e bugno kod kaka wanyalo tiyo gi puonjgo e ngimawa. E chak sula ka sula, nitie weche ma lero gima duong’ ma sulano wuoyoe kod Ndiko manie bug Tich Joote midhi non e sulano.

¹⁸ Nitie gik mamoko e bugni ma nyalo konyo ng’ato sama otimo puonjruok mare mar Muma. Pichni mabeyo ma nyiso gik ma ne otimore mondik  e bug Tich Joote, biro konyi goyo picha e pachi kendo paro matut e wi sula misomo. Thoth sula manie bugni nigi sanduge moting’o weche momedore ma nyalo konyi. Moko kuom sandugego wuoyo e wi jomoko manie Muma ma wanyalo luwo yie margi. Moko to chiwo weche momedore e wi kuonde moko, gik ma ne otimore, timbe mag ji, kata jomamoko miwuoyoe e bug Tich Joote.

19. Gin penjo mage monego wapenjre kinde ka kinde?

¹⁹ Bugni nyalo konyi nonori iwuon. Kata bed ni isebedo kilendo kuom kinde marom nade, ber mondo ikaw thuolo kinde ka kinde mondo ipar matut gik miketo motelo e ngimani kod paro ma in-go e wi tij lendo. (2 Kor. 13:5) Penjri niya: ‘Be aneno tij lendo kaka tich monego otim mapiyo? (1 Kor. 7:29-31) Be alando wach maber ka an gi chir kod kinda? (1 The. 1:5, 6) Be atimo duto ma anyalo mondo ariw lwedo tij lendo kod loko ji obed jopuonjre?’​—Kol. 3:23.

20, 21. Ang’o momiyo tich momiwa onego otim mapiyo, to onego wang’ad mar timo ang’o?

²⁰ Kinde duto kik wiwa wil ni omiwa tich maduong’ mar lendo kendo loko ji obed jopuonjre. Kaka kinde medo kalo e kaka onego watim tich momiwani mapiyo kaka nyalore. Giko mar pinyni medo mana kayo machiegni. Ngima mar ji mang’eny ni kama rach moloyo kinde moro amora mosekalo. Ok wang’eyo ni gin ji adi ma pod chunygi ni kare ma biro rwako wach ma walandonegi. (Tich 13:48) Kata kamano, wan gi ting’ mar konyogi ka pok sa ong’adogi oko.​—1 Tim. 4:16.

²¹ Omiyo, dwarore ni waluw ranyisi mar jolendo ma jokinda ma ne olendo e kinde Jokristo mokwongo. We mondo puonjruok bugni e yo matut okonyi medo kinda kod chir e tiji mar lendo. Bende, we bugni omed jiwi mondo ‘ichiw neno e okang’ mong’ith e wi wach Pinyruodh Nyasaye.’​—Tich 28:23.